ملتان (سپیشل رپورٹر)انسداد دہشت گردی کی خصوصی عدالت ملتان کے جج مسعود ارشد نے سابق ڈپٹی کمشنر کے بیٹے کو تاوان کے لیے اغواء کرنے کے مقدمہ میں ملوث حکمران جماعت کے رکن صوبائی اسمبلی ظہیر الدین علیزئی سمیت 13 ملزمان کی ضمانتیں منسوخ کرنے کی استدعا مسترد کردی ہے۔ مقدمہ میں مزید کارروائی کے لیے سماعت 20 جنوری تک ملتوی کردی گئی ہے۔ مقدمہ میں دو ملزمان جہانزیب اور اصغر علی کے دائمی وارنٹ گرفتاری بھی جاری ہوچکے ۔قبل ازیں فاضل عدالت میں پولیس تھانہ چہلیک کے مطابق مدعی سابق ڈپٹی کمشنر محمد منیر بدر اعوان نے 14 اکتوبر 2015 کو مقدمہ درج کرایا۔ جس میں موقف اختیار کیا کہ 2005 میں عہدے سے ریٹائر ہوا تو ملزم مدثر چوہدری سے کاروباری تعلقات استوار ہوئے ملزم نے اعتبار کا فائدہ اٹھا کر ایک کروڑ تین لاکھ روپے اینٹھ لیے جس پر کارروائی کی درخواست دی تو ملزم نے رنجش بنالی اور پولیس تھانہ گجرانوالہ کے ایس ایچ او میاں خلیل احمد اور سب انسپکٹر اصغر، عابد رسول سمیت دیگر اہلکاروں نے اختیارات کا ناجائز فائدہ اٹھاتے ہوئے بیٹے کو ایک خاتون کے اغواء  کے مقدمہ نمبر 55 زیر دفعہ 365 جو کہ 17 مارچ 2014 کو گجرنوالہ میں درج ہوا تھا بیٹے کو اغواء کرلیا جس کی رہائی کے لیے ڈیڑھ کروڑ روپے طلب کیے گئے بیٹے کو جوڈیشل حوالات سے پولیس مقابلے میں قتل کی دھمکیاں دی گئی جس پر سائل نے ایک کروڑ 20 لاکھ روپے ادا کیے ملزمان نے یہ رقم حکمران جماعت کے رکن صوبائی اسمبلی ظہیرالدین علی زئی کے اکاؤنٹ سے منتقل ہوئی، ملزمان نے واقعے کو لین دین کا معاملہ قرار دینے کے لیے کھیل رچایا تھا۔ مقدمہ میں محمد مبشر ،رانا جہانزیب راجپوت عرف ٹیپو، احتشام علی، محمد یسین ناگرہ،سابق ایس ایچ او میاں خلیل احمد، سابق سب انسپکٹرز عابد رسول اور اصغر علی، محمد مدثر چوہدری، ناصر علی ناگرہ،میاں فرزند علی گوہر،زاہد پٹھان، یاسمین احمد نامزد ہیں۔ اب بیٹا بااثر ملزمان کے خوف سے بیرون ملک آسٹریلیا رہائش پذیر ہوگیا ہے۔ جس کا بذریعہ سکائپ بیان ریکارڈ کیا جاسکتا ہے اور متعلقہ اداروں ہوم ڈیپارٹمنٹ سمیت سفارت خانوں سے مدد بھی لی جاسکتی ہے۔ یاد رہے کہ اس کیس میں ملزم ایم پی اے ظہیر الدین علیزئی نے حاضری سے استثنیٰ لے رکھی ہے۔

گوجرانوالہ:نجی کالج کے ہمراہ ٹریفک قوانین کے حوالے سے آگاہی واک