پیرس (صاحبزادہ عتیق الرحمٰن) پاکستان کی 20 ٹونٹی فائنل میں فتح پر فرانس بھر میں پاکستانی کمیونٹی کا جشن فتح پیرس کے مختلف علاقوں میں ڈھول کی تھاپ پر ڈانس اور مٹھائی تقسیم کی گئی۔ تفصیلات کے مطابق فائنل میچ کو دیکھنے کے لئے بہت سارے لوگوں نے گھروں اور دکانوں پرانتظامات کر رکھے تھے جہاں پر سینکڑوں لوگوں نے میچ دیکھا۔ مقامی دکانداروں قاضی عامر لطیف بھائی اور قذافی نے تین سکرینوں کے ساتھ میچ دیکھنے کا بندوبست کر رکھا تھا۔ پاکستانی ٹیم کی کامیابی پر لوگوں نے زبردست نعرے بازی کی اور ڈھول کی تھاپ پر رقص کیا۔ پاکستانی فیمیلیز نے اپنی کاروں پر شہر کے چکر لگائے اور پاکستانی پرچم لہرائے۔ قومی ٹیم کی اس شاندار فتح پر پاکستان مسلم لیگ ن کے یوسف خان، پاکستان مسلم لیگ ق کے چودھری شاہین، پی پی پی فرانس کے ملک منیر، ادارہ منہاج القرآن کے ناظم اعلیٰ رحیق احمد عباسی جو کہ فرانس کے دورے پر ہیں اور پاکستانی کمیونٹی کی سیاسی، سماجی کاروباری اور مذہبی شخصیات نے بھی پاکستانی ٹیم اور قوم کو مبارک باد اور اس فتح کو اللہ تعالیٰ کی طرف سے ایک انعام قراردیا۔