واشنگٹن (آن لائن) امریکی صدر اوباما نے کہا ہے امریکی فوج پاکستان میں داخل نہیں کی ج ائے گی پاک فوج دہشت گردوں کیخلاف مؤثر کارروائی کر رہی ہے۔ نجی ٹی وی کو انٹرویو کی مزید تفصیلات کے مطابق انہوں نے کہا کہ پاکستان کے عوام بد دماغ تشدد کو سمجھ چکے ہیں کہ اس سے خوشحالی نہیں آئے گی۔ اکثر لوگ کہتے ہیں کہ جنوبی وزیرستان میں آپریشن کا فیصلہ قبل ازوقت ہے اور ہو سکتا ہے کہ پاکستان کی حکومت یہ جنگ نہ جیت سکے؟ اس سوال پراوباما نے کہا کہ یہاں پر دو نقاط ہیں نمبر ون یہ کہ کوئی بھی حکومت پاکستان پر دبائو ڈال سکتا ہے اور نہ ڈالنا چاہیے۔ پاکستانی حکومت صرف پاکستانی عوام کے سامنے جواب دہ ہے۔ میرے خیال میں اب پاکستان کے عوام اورحکومت یہ جان چکی ہے کہ جب انتہا پسند معتدل سنی رہنماء ڈاکٹر سرفراز نعیمی جیسے لوگوں کو قتل اور بم دھماکوں میں بے گناہ انسانوں کی جانیں ضائع کر رہے ہیں تو ملک خوشحال اورترقی نہیں کر سکے گا لہذا پاکستان کی حکومت نے جو فیصلہ کیا ہے امریکہ اس کی حمایت کرتا ہے۔ ایک اور سوال پر امریکی صدر نے کہا کہ پاکستان کی قائداعظم محمد علی جناح کے دور سے یہ تاریخ رہی ہے کہ وہ مشکلات سے دو چار رہا ہے اوراس نے ہمیشہ اپنے مسائل جرات مندی سے حل کئے ہیں۔ لہذا اب بھی ہمیں اعتماد ہے کہ پاکستانی عوام اپنے اختلافات اور انتہا پسندوں کو تنہا کرنیکی کوشش جمہوری عمل کے ذریعے حل کر رہے ہیں۔ انہوں نے کہا کہ پاکستان انتہا پسندی کے خاتمے کی صلاحیت رکھتا ہے اور امریکہ پاکستان کے ساتھ صرف فوج سے فوج کے ساتھ تعلقات قائم نہیں کرنا چاہتا بلکہ اس سے بھی بڑھ کر تعلقات قائم کرنا چاہتا ہے۔امریکی صدر باراک اوباما نے انٹرویو کے دوران پاکستان میں ڈرون حملوں پر بات کرنے سے انکار کردیا۔ انہوں نے یہ کہہ جواب دینے سے انکار کردیا کہ وہ مخصوص آپریشنوں پر تبصرہ نہیں کرتے تاہم انہوں نے یہ بات واضح کی کہ وہ پاکستان میں امریکی فوج کو بھیجنے کا کوئی ارادہ نہیں رکھتے۔ اپنے سلامتی کے معاملات سے پاکستانی حکومت اورپاک فوج خود ہی نمٹے گی۔