انتظامیہ‘ ایل ڈبلیوایم سی شہر کی صفائی میں ناکام ہوچکے:ذکراللہ مجاہد
لاہور(خصوصی نامہ نگار) امیر جماعت اسلامی لاہور میاں ذکر اللہ مجاہد نے کہا ہے کہ نااہل حکمرانوں نے صاف ستھرے باغوں اور پھولوں کے شہر کو غلاظت کا ڈھیر بنا دیا ہے۔انتظامیہ اور ایل ڈبلیو ایم سی شہریوں کو صفائی کا بہتر ماحول دینے میں مکمل ناکام ہو چکے ہیں۔حکومتی ڈیڈلائن ختم ہوئے بھی کئے دن گزر چکے لیکن ابھی تک شہر گندگی کی آماجگاہ بنا ہوا ہے۔چند سڑکیں اور مخصوص علاقے صاف کرنے کے بعد کلین لاہور کے دعوے کرنے والے حکمران عوام کو دھوکہ دے رہے ہیں۔بزدار حکومت نے صوبائی دارالحکومت کو گندگی کے ڈھیر، ابلتے گٹروں اور تعفن کے سپرد کردیا ہے۔ہزاروں ٹن کچرا شہر کے مختلف علاقوں میں حکومتی اور اداروں کی بے حسی کا منظر کشی کررہا ہے۔
