پی ایس ایل کے آغاز سے قبل ہی لاہور قلندرز کو دھچکا
آکلینڈ(آئی این پی) پاکستان سپر لیگ کے تیسرے ایڈیشن کے آغاز سے قبل ہی لاہور قلندرز کو بڑا دھچکا لگا ہے۔لاہور قلندرز کے بیٹسمین کرس لین کندھے کی انجری کا شکار ہوگئے جس کے بعد وہ پی ایس ایل تھری سے بھی باہر ہوگئے۔آسٹریلیا سے تعلق رکھنے والے کرس لین نیوزی لینڈ کے خلاف سہہ فریقی سیریز کے آج کھیلے جانے والے فائنل میچ کے دوران فیلڈنگ کرتے ہوئے دائیں کندھے کی انجری کا شکار ہوئے جس کے بعد انہیں آرام کا مشورہ دیا گیا ہے۔کرس لین اس سے قبل بائیں کندھے کی انجری کا شکار ہوئے تھے اور حال ہی میں انہوں نے سرجری بھی کرائی تھی۔آسٹریلوی کرکٹ بورڈ کی جانب سے کرس لین کو فوری طور پر آکلینڈ سے برسبین پہنچنے کی ہدایت کی گئی ہے جب کہ بورڈ کا کہنا ہے کہ وہ پی ایس ایل میں شرکت نہیں کرسکیں گے۔