کشمیریوں کو آزادی نہ دی گئی تو تحریک مسلح شکل اختیار کر سکتی ہے : مشعال ملک

22 فروری 2017

اسلام آباد(آئی این پی) حریت رہنما یاسین ملک کی اہلیہ مشعال ملک نے کہا ہے کہ تحریک آزادی کشمیر پر امن طور پر جاری ہے لیکن کشمیریوں کو آزادی نہ دی گئی تو تحریک مسلح شکل اختیار کر سکتی ہے۔ تقریب سے خطاب میں مشعال ملک کا کہنا تھا کہ اکیس فروری کشمیری خواتین کے لئے سیاہ ترین دن کی حیثیت رکھتا ہے۔ بدقسمتی سے خواتین کی اجتماعی آبروریزی میں ملوث کسی بھارتی فوجی کو تاحال سزا نہیں دی گئی۔انکا کہنا تھا کہ تمام تر بھارتی مظالم کے باوجود کشمیریوں کے حوصلے اب بھی چٹان کی طرح مضبوط ہیں۔انہوں نے کہاکہ پائیدار عالمی امن کشمیر سے ہو کر گزرتا ہے، عالمی برادری کو مسئلہ کشمیر پر خصوصی توجہ مرکوز کرنی ہوگی، پارلیمنٹ کی خصوصی کشمیر کمیٹی سے متعلق انکے بیان کو سیاق و سباق سے ہٹ کر پیش کیا گیا۔انکا مزید کہنا تھا کہ کشمیر کمیٹی کے چیئرمین مولانا فضل الرحمن سمیت تمام سیاستدان انکے لئے قابل احترام ہیں تاہم کشمیر کمیٹی سمیت ہر قومی و بین الاقوامی فورم میں واضح نمائندگی چاہتے ہیں تاکہ عالمی سطح پر مسئلہ کشمیر کو موثر انداز میں اٹھایا جا سکے۔