لاہور (خصوصی رپورٹر) سپیکر قومی اسمبلی سردار ایاز صادق کی صدارت میں ہونے والے ”پولیس کمیونٹی اجلاس“ میں این اے 122 کے بعض مکینوں اور بلدیاتی نمائندوں نے ”افغانوں“ کی آڑ میں پٹھانوں کے خلاف پولیس کارروائیوں پر شکوہ کیا۔ اجلاس میں شریک ایس پی سول لائن علی رضا نے کہا کہ ملک میں دہشت گردی ہو رہی ہے۔ چیئرنگ کراس پر ہونے والی دہشت گردی میں افغانوں کے ملوث ہونے سے تمام پاکستانیوں کی ذمہ داری بڑھ گئی ہے۔ انہوں نے کہا کہ ”پولیس ایپ“ قائم کی جا رہی ہے جس کے بعد ہر بلدیاتی منتخب نمائندہ پولیس سے براہ راست رابطہ کر سکے گا۔ ادھر سردار ایاز صادق نے صدارتی خطاب میں کہا کہ دہشت گردی کو جڑ سے اکھاڑنا ضروری ہے۔ انہوں نے کہا کہ ہم نے افغان بھائیوں کو اس لئے یہاں پناہ دی ہے انہیں بھی چاہئے کہ اسی جذبے کا مظاہرہ کریں۔ اپنے اردگرد مشکوک شخص کو دیکھیں‘ پولیس کو اطلاع دیں۔