لاہور ہائیکورٹ میں خود سوزی کر نیوالے ملازم کی 2بیویوں کو نجی کمپنی نے ادائیگی کردی 

لاہور (خبر نگار )  لاہور ہائیکورٹ میں خودسوزی کرنے والے شہری آصف جاوید کی 2 بیویوں کو نجی کمپنی نے انسانی ہمدردی کی بنیاد پر 75 لاکھ روپے مالیت کے چیک دے دئیے۔ لاہور ہائیکورٹ کے جسٹس خالد اسحق نے درخواست کی سماعت کی، نجی کمپنی نے عدالت میں 75 لاکھ روپے مالیت کے چیک پیش کر دئیے۔عدالت عالیہ نے 37 لاکھ 50 ہزار کے 2 چیک آصف جاوید کی 2 بیویوں کو دینے کی ہدایت کرتے ہوئے درخواست نمٹا دی۔آصف جاوید نامی شہری کو نجی کمپنی نے 2016 ء مین برطرف کیا تھا، 2019 ء میں لیبر کورٹ نے سائل کی برطرفی کا فیصلہ کالعدم قرار دے کر نوکری بحال کرنے کا حکم دیا تو نجی کمپنی نے لیبر کورٹ کا فیصلہ نیشنل انڈسٹریل ریلیشن کمیشن میں چیلنج کر دیا تھا۔23 نومبر 2020 ء کو نیشنل انڈسٹریل ریلیشن کمیشن نے نجی کمپنی کی اپیل خارج کردی۔نجی کمپنی نے دسمبر 2020 ء میں لاہور ہائیکورٹ میں کیس دائر کیا، جس کے بعد سائل آصف جاوید کا کیس 2020 ء سے لاہور ہائیکورٹ میں زیر سماعت تھا۔شہری نے لاہور ہائیکورٹ کے باہر خود کو آگ لگالی تھی۔ بعد میں وہ اسپتال میں زخموں کی تاب نہ لاتے ہوئے جاں بحق ہوگیا تھا۔