فاروق ستار کی عدم پیشی پر برہمی، آئندہ سماعت پر نہ آئے تو جیل بھیج دینگے: عد الت
کراچی (آئی این پی) انسدادِ دہشت گردی عدالت نے فاروق ستار کی عدم حاضری پر برہمی کا اظہار کرتے ہوئے کہا ہے کہ ایم کیو ایم کے رہنما پیش نہ ہوئے تو جیل بھیج دیں گے۔گزشتہ روز کراچی کی انسدادِ دہشت گردی عدالت میں ایم کیوایم بانی کی اشتعال انگیز تقاریر کے مقدمات کی سماعت ہوئی۔ ایم کیوایم رہنما محفوظ یار خان، شاہد پاشا، حنید لاکھانی اور دیگر پیش ہوئے۔ایم کیو ایم رہنما فاروق ستار کی عدم حاضری پر عدالت نے برہمی کا اظہار کیا۔ فاضل جج نے کہا کہ فاروق ستار آئندہ سماعت پر پیش نہ ہوئے تو جیل بھیج دیں گے۔ ایم کیو ایم کے وکیل نے کہا کہ فاروق ستار مصروفیت کی وجہ سے پیش نہیں ہوسکتے، حاضری سے استثنیٰ دیا جائے۔عدالت نے پیش نہ ہونے پر ایم کیو ایم کے دوسرے رہنما امجد اللہ کی ضمانت منسوخ کرتے ہوئے وارنٹ گرفتاری جاری کردیئے۔ عدالت نے امجد اللہ اور دیگر کو 5 مئی تک گرفتار کرکے پیش کرنے کا حکم دے دیا۔ رینجرز کی مدعیت میں تھانہ عزیزآباد میں ملزمان کے خلاف مقدمہ درج ہے۔ پولیس کے مطابق بانی ایم کیوایم نے قومی اداروں کے خلاف نازیبا زبان استعمال کی۔