پاکستان نے تیر اندازی میں بین الاقوامی میڈل جیت کر تاریخ رقم کردی۔ قومی تیر اندازوں نے قازقستان میں ملکی تاریخ میں پہلی بار عالمی برونز میڈل اپنے نام کر لیا۔

تفصیلات کے مطابق پاکستان آرچری فیڈریشن کے سیکریٹری وصال محمد کی کاوشوں کا ثمر مل گیا۔ قومی تیر اندازوں نے قازقستان انٹر نیشنل انڈور ایونٹ میں عمدہ پرفارمنس پیش کی۔ وصال محمد کا کہنا ہے کہ پاکستان کی تین رکنی آرچری ٹیم نے یہ کامیابی حاصل کی ہے۔سیکریٹری آرچری فیڈریشن وصال محمد نے کہا کہ آرچری ٹیم نے قازقستان میں منعقد ہونے والی گرینڈ پریکس آستانہ اِنڈور آرچری چیمپئن شپ میں عمدہ کھیل پیش کرتے ہوئے برونز میڈل جیت لیا۔ یہ کسی بھی عالمی ریکرو ایونٹ میں پاکستان کیلئے حاصل کیا گیا پہلا تمغہ ہے۔وصال محمد نے کہا کہ قازقستان کے شہر آستانہ میں منعقدہ ایونٹ میں کوالیفیکیشن راؤنڈ ز کے بعد محمد سرفراز نے انڈورریکرومکسڈ ٹیم ایونٹ میں وکٹری اسٹینڈ تک رسائی پائی اور راحت سلطانہ کے ساتھ برونز میڈل حاصل کیا۔قومی ٹیم میں شامل تیسرے تیر انداز محمد الیاس تھے۔محمد الیاس نے اس شاندار کامیابی پر پاکستان بھر کے تمام تیر اندازوں کو مبارک باد پیش کرتے ہوئے کہا کہ چیمپئن شپ میں شرکت کرنا اور میڈلز حاصل کرنا بڑا کارنامہ ہے۔ حکومتی سرپرستی حاصل رہی تو مستقبل میں بھی تیر اندازی میں مزید کامیابیاں حاصل کر سکتے ہیں۔