ٹرمپ مخالف مظاہرے جاری ’’کوئی بادشاہ نہیں ظالم کیخلاف مزاحمت‘‘ کے نعرے

 نیویارک (نوائے وقت رپورٹ) ڈونلڈ ٹرمپ کے خلاف مظاہروں کا سلسلہ جاری ہے۔ جبکہ گزشتہ روز بھی ہزاروں مظاہرین نے نیویارک، واشنگٹن سمیت دیگر شہروں میں امریکی صدر کے خلاف بڑی ریلیاں نکالیں۔ نیویارک میں لوگ شہر کی مرکزی لائبریری کے باہر جمع ہوئے۔ انہوں نے پلے کارڈز اٹھا رکھے تھے جن پر امریکی صدر کے خلاف نعرے درج تھے۔ اور "امریکہ میں کوئی بادشاہ نہیں" اور "ظالم کے خلاف مزاحمت" جیسے الفاظ درج تھے۔ بہت سے لوگوں نے ڈونلڈ ٹرمپ کی جانب سے غیر دستاویزی تارکین وطن کی ملک بدری کے فیصلے کو تنقید کا نشانہ  بنایا اور کہا کہ کوئی آئی سی ای (تارکین وطن کیخلاف کریک ڈانؤن کرنے والی ایجنسی) نہیں، کوئی خوف نہیں،  یہاں تارکین وطن کا خیر مقدم ہے کے نعرے لگائے۔