گوجرانوالہ:اینٹی کرپشن ،جوڈیشل مجسٹریٹ کی مشترکہ کارروائی 

گوجرانوالہ(نمائندہ خصوصی)اینٹی کرپشن اور جوڈیشل مجسٹریٹ نے مشترکہ چھاپہ مار کاروائی کے دوران پٹواری اورمیونسپل کمیٹی کے کلرک  کو رشوت لیتے ہوئے رنگے ہاتھوں گرفتار کر لیا ،یہ کاروائی ڈی جی اینٹی کرپشن پنجاب سہیل ظفر چٹھہ کی زیر نگرانی اور ڈائریکٹر اینٹی کرپشن گوجرانوالہ ڈویژن امجد شہزاد کی ہدائت پر عمل میں لائی گئی، سرکل آفیسر اینٹی کرپشن ملک اصغر اعوان نے جوڈیشل مجسٹریٹ کے ہمراہ مشترکہ چھاپہ مار کاروائی کرکے انتقال وراثت پاس کرنے کے عوض 25000روپے رشوت لینے والے پٹواری محمد شہباز کو رنگے ہاتھوں گرفتار کر لیا اور اس کے قبضہ سے نشان زدہ نوٹ بھی برآمد کر لئے ہیں جبکہ دوسری کاروائی سرکل آفیسر گجرات محمد افضل گجر نے جوڈیشل مجسٹریٹ کے ہمراہ کاروائی کرکے میونسپل کمیٹی جلالپور جٹاں کے ریکارڈ کیپر امان اللہ کو لیٹ اندراج سرٹیفکیٹ جاری کرنے کے عوض 30ہزار روپے رشوت وصول کرتے ہوئے گرفتار کر لیا، اسسٹنٹ ڈائریکٹر اینٹی کرپشن رانا شبیر اشرف نے بتایا کہ سرکاری ریکارڈ میں جعل سازی اور سرکاری خزانہ کو نقصان پہنچانا ناقابل تلافی جرم ہے جس کی ہر گز اجازت نہیں دی جا سکتی۔