برطانوی شہزادہ ولیم اور ان کی اہلیہ گزشتہ ہفتے 14 اکتوبر کی شب اپنے پہلے تاریخی پانچ روزہ دورے پر پاکستان پہنچے تھے اور وہ 18 اکتوبر کی دوپہر تک یہاں رہے۔اپنے پانچ روزہ دورے کے دوران برطانوی شاہی جوڑے نے دارالحکومت اسلام آباد کے سرکاری اسکول کے دورے سمیت ایوان، صدر، وزیر اعظم ہاؤس اور یادگار پاکستان میں برطانوی ہائی کمیشن کی جانب سے منعقد کردہ عشائیے میں شرکت کی۔

شاہی مہمان دورے کے دوسرے روز صوبہ خیبرپختونخوا کے شہر چترال گئے اور وہاں انہوں نے کیلاش قبیلے کے ساتھ وقت گزارنے سمیت کوہ ہندو کش کے خوبصورت نظاروں کو بھی دیکھا۔شاہی جوڑے نے تیسرے روز پنجاب کے دارالحکومت لاہور کا رخ کیا اور انہوں نے بادشاہی مسجد، نیشنل کرکٹ اکیڈمی، ایس او ایس ولیج اور شوکت خانم کینسر ہسپتال سمیت دیگر جگہوں کا دورہ کیا۔شاہی جوڑے نے آخری روز بھی سرگرمیوں میں حصہ لیا اور 18 اکتوبر کی دوپہر تاریخی دورہ مکمل کرکے برطانیہ روانہ ہوگئے۔

شاہی جوڑے کے پہلے پاکستانی دورے پر جہاں پاکستانی میڈیا نے انہیں خصوصی کوریج دی، وہیں برطانوی و امریکی میڈیا سمیت دیگر عالمی نشریاتی اداروں نے بھی شاہی جوڑے کے دورہ پاکستان پر خصوصی نظر رکھی۔پاکستان کے پہلے دورے کے دوران ہی شہزادی کیٹ مڈلٹن نے شہزادہ ولیم سے شادی کے بعد پہلا ٹی وی انٹرویو بھی دیا، جس میں انہوں نے دورہ پاکستان سے متعلق کھل کر بات کی۔

شہزادی کیٹ مڈلٹن نے شادی کے بعد پہلا ٹی وی انٹرویو امریکی نشریاتی ادارے ’سی این این‘ کو دیا، ان کا انٹرویو دورے کے تیسرے روز لاہور میں ریکارڈ کیا گیا تھا۔اپنے پہلے ٹی وی انٹرویو میں شہزادی کیٹ مڈلٹن نے کہا کہ انہیں بطور شاہی فرد پاکستان کے علاوہ دیگر ممالک دیکھنے کا موقع بھی ملا ہے اور انہوں نے اب تک بہترین نظاروں والے ممالک بھی دیکھے ہیں۔

شہزادی کیٹ مڈلٹن نے اپنے مختصر انٹرویو میں پاکستانی سرزمین اور خوبصورت نظاروں کی تعریف کرتے ہوئے کہا کہ انہیں پاکستان کی خوبصورتی دیکھ کر سچ مچ حیرانگی ہوئی۔انہوں نے پاکستان میں ہونے والے سماجی کاموں پر بھی اطمینان کا اظہار کیا اور لاہور کے ایس او ایس ولیج کی بھی تعریف کی اور کہا کہ بچوں کی دیکھ بھال کرنے والے ادارے سے منسلک خواتین انتہائی مثبت سوچ کے ساتھ اہم خدمات سر انجام دے رہی ہیں۔کیتھرائن کیٹ مڈلٹن کے مطابق انہیں اور ان کے شوہر کو پاکستانی دورہ کرکے بہت اچھا لگا اور انہوں نے اپنے دورے کے دوران پاکستان کا چھپا ہوا حسن دیکھا اور انہیں یہ سب دیکھ کر انتہائی اچھا محسوس ہوا۔شہزادی مڈلٹن نے پاکستانی خواتین کی بھی تعریف کی اور بتایا کہ انہوں نے اپنے دورے کے دوران خواتین کو مثبت کاموں میں مصروف دیکھا۔

خیال رہے کہ کیٹ مڈلٹن کے دورہ پاکستان کے دوران ان کی جانب سے پہنے گئے مشرقی طرز کے لباس کی بھی تعریفیں کی گئیں اور انہوں نے دورے کے دوران پاکستانی فیشن ہاؤسز اور ڈیزائنرز کا تیارہ کردہ لباس بھی پہنا۔ساتھ ہی شہزادہ ولیم نے بھی پاکستانی دورے کے دوران شیروانی پہن کر نئی تاریخ رقم کی، وہ شیروانی پہننے والے پہلے برطانوی شاہی فرد بن گئے۔

شہزادہ ولیم اور کیٹ مڈلٹن سے قبل شہزادہ ولیم کے والد شہزادہ چارلس اپنی اہلیہ کمیلا پارکر کے ساتھ 2006 میں پاکستانی دورے پر آئے تھے، ان سے قبل شہزادہ ولیم کی والدہ شہزادی ڈیانا بھی پاکستانی دورے پر آ چکی تھیں۔ملکہ برطانیہ بھی ماضی میں پاکستانی دورہ کر چکی ہیں۔

خیال رہے برطانوی شاہی جوڑے کی لاہور سے اسلام آباد روانگی کے بعد طیارہ خراب موسم کے باعث مشکل صورتحال سے دوچار ہوگیا تھا تاہم پائلٹ انتہائی مہارت سے طیارے کو واپس لاہور ائیرپورٹ پر اتارنے میں کامیاب ہوگیا، شہزادی کیٹ میڈلٹن نے مشکل صورتحال کو ایڈونچر قرار دیا تھا۔شہزادی کا کہنا تھا کہ طیارہ ہچکولے کھا رہا تھا، رائل ائیرفورس کےعملے نے بہت مہارت دکھائی، ہماراخیال رکھا اور حفاظت سے ہمیں گھرپہنچایا۔