انٹر جیل والی  بال ٹورنامنٹ مکمل،راولپنڈی ریجن نے فائنل جیت لیا 

لاہور(سپورٹس رپورٹر)وزیر اعلیٰ پنجاب جیل اصلاحات پروگرام کے تحت پنجاب بھر کی جیلوں میں والی بال ٹورنامنٹ اختتام پذیر ہو گیا۔ ٹورنامنٹ کا فائنل سینٹرل جیل لاہور میں ہوا جس میں راولپنڈی ریجن نے لاہور ریجن کو ہرا کر ٹورنامنٹ اپنے نام کر لیا۔ فائنل میں چیئرپرسن وزیر اعلی ٹاسک فورس رانا منان خان نے بطور مہمانِ خصوصی شرکت کی جبکہ آئی جی جیل خانہ جات میاں فاروق نذیر، ڈی آئی جی ہیڈ کوارٹرز میاں سالک جلال اور ڈی آئی جی لاہور ریجن نوید رف بھی شریک ہوئے۔راولپنڈی ریجن کے کھلاڑی عقیل مین آف دی ٹورنامنٹ اور واجد حسین مین آف دی میچ قرار پائے۔ پنجاب بھر کی جیلوں میں کھیلے جانیوالے شوٹنگ والی بال ٹورنامنٹ میں تیسری پوزیشن ساہیوال ریجن نے حاصل کی۔ فاتح ٹیموں اور اعلی کارکردگی کا مظاہرہ کرنے والے کھلاڑیوں میں ٹرافی اور نقد انعامات تقسیم کیے گئے۔