بھکھی پاور پلانٹ بھی ایک دھوکہ ثابت ہوگا: محمود الرشید
لاہور ( سپیشل رپورٹر) پنجاب اسمبلی میں قائد حزب اختلاف میاں محمودالرشید نے کہا کہ جعلی منصوبوں کے افتتاح، شعبدہ باز یوں میں شہباز شریف کا کوئی ثانی نہیں، بھکی پاور پلانٹ بھی ایک دھوکہ ثابت ہوگا، جعلی منصوبوں کے افتتاح پر شہباز شریف کا نام گینز بک آف ورلڈ ریکارڈ میں آنا بنتا ہے، چیلنج کرتا ہوں پنجاب میں ٰ پاور پلانٹ کا کوئی ایک بھی ایسا منصوبہ نہیں جو مکمل فعال ہو اور سستی بجلی فراہم کرتا ہوں، بجلی اور لوڈشیڈنگ پر حکومت نے زبانی جمع خرچ سے کام لیا، شہباز شریف نے انرجی شعبے کو بری طرح نظر انداز کرتے اربوں روپے سڑکوں، پلوں پر لگا دیئے۔ شہباز شریف نے پنجاب میں جو منصوبہ لگایا وہ ناکام رہا، انہوں نے حکومتی کارکردگی کو مایوس کن قرار دیتے ہوئے کہا کہ کہ انسان حکومت کی ترجیحات میں کبھی شامل نہیں رہا، یہی وجہ ہے کہ تعلیم صحت اور صاف پانی سمیت عوام کو کوئی بنیادی حقوق میسر نہیں۔ ایک تو مفاد عامہ کے منصوبہ جات کیلئے بجٹ کم مختص کیا گیا الٹا جو تھا وہ بھی اللے تللے منصوبوں پر لگا دیئے، انہوں نے کہا کہ پنجاب حکومت نے میگاپراجیکٹس کے لئے دیگر اضلاع کے صاف پانی، کلاس رومز،انڈسٹری اور ٹرانسپورٹ کے کے منصوبوں کے 30 ارب روپے لاہور منتقل کئے اور انہیں اورنج ٹرین اور سڑکوں پر خرچ کیا۔