لاہور(نمائندہ سپورٹس ) پی سی بی گورننگ بورڈ اجلاس کا اعلامیہ جاری کردیا گیا۔پی سی بی گورننگ بورڈ نے ورلڈ کپ کے بعد ٹیم ، مینجمنٹ ، سلیکشن کمیٹی کے احتساب کی منظوری دے دی، چیئرمین کی جگہ ایم ڈی کو تمام بڑے اختیارات منتقل ہوگئے، کوچز اور سلیکشن کمیٹی ممبران کے تقرر اور ڈومیسٹک کرکٹ کا اختیار بھی ایم ڈی کے پاس ہوگا تاہم کپتان کا انتخاب چیئرمین کے پاس ہی رہے گا۔اعلامیہ میں کہا گیا ہے کہ ورلڈکپ کے بعد تمام کھلاڑیوں، ٹیم انتظامیہ اور سلیکشن کمیٹی کی تین سالہ کارکردگی کا جائزہ لیا جائے گا۔اس حوالے سے چیئرمین مزید تجویز کیلئے رپورٹ پیش کریں گے۔ایم ڈی وسیم خان نے اپنے دورہ انگلینڈ کی رپورٹ پیش کرتے ہوئے بتایا کہ انگلینڈ اینڈ ویلز کرکٹ بورڈ کے ساتھ پلیئرز اور آ فیشل ایکسچینج پروگرام شروع ہوگا جبکہ بورڈ ممبران نے ٹیم کی کارکردگی پر مایوسی کا اظہار کیا اورآ ئندہ میچوں میں ٹیم سے عمدہ کارکردگی کی توقع کا اظہار کیا۔ایم ڈی نے واضح کیا کہ آئندہ سال پاکستان ایشیا کپ اور ٹی ٹونٹی کی میز بانی کرے گا جس پرگورننگ بورڈ اراکین نے ایشیا کپ کی میزبانی ملنے پر چیئرمین پی سی بی کو مبارکباد دی۔ ایشیا کپ پاکستان میں کرکٹ کو بہتر بنانے میں مدد ملے گی۔پاکستان کرکٹ بورڈ نے گورننگ بورڈ کے اجلاس کے دوران قومی ٹیم پر مکمل اعتماد اور سپورٹ کا اعادہ کیا ہے۔چیئرمین پی سی بی احسان مانی کی زیرصدارت گورننگ بورڈ کے اجلاس کے دوران قومی ٹیم کی ورلڈکپ میں پرفارمنس، ٹیم سٹرکچر، فرسٹ کلاس کرکٹ سمیت دیگر امور پر تبادلہ خیال کیا گیا۔گورننگ بورڈ کے اجلاس کے اعلامیے کے مطابق ورلڈکپ میں قومی ٹیم کی پرفارمنس توقعات کے مطابق نہیں تاہم امید ہے باقی میچزمیں ٹیم پوٹینشل کے مطابق کھیلے گی۔ورکشائر کاؤنٹی کے ساتھ بھی پلیئرز کے تبادلے کا معاہدہ ہوچکا ہے۔ پی سی بی آئندہ سال فرسٹ کلاس پلیئرز انگلینڈ بھی بھیجے گا۔پی سی بی گورننگ بورڈ نے بگٹی کرکٹ سٹیڈیم کو کمرشلائز کرنے کا فیصلہ کیا جس کے لیے ورکنگ گروپ تشکیل دیا جائیگا۔ پاکستان کرکٹ بورڈکے اجلاس میں اتفاق کیا گیا کہ ورلڈکپ2019 میں قومی ٹیم توقعات کے مطابق نہیں کھیل رہی اور ٹورنامنٹ کے بعد تمام کھلاڑیوں، کوچز اور سلیکشن کمیٹی کی کارکردگی کا باریک بینی سے جائزہ لیا جائے۔پی سی بی گورننگ بورڈ کا 54 واں اجلاس چیئرمین احسان مانی کی زیرصدارت ہوا جس میں دیگر ممبران بھی شریک ہوئے۔ میٹنگ میں فیصلہ کیا گیا کہ آ ئندہ میچوں میں ٹیم سے عمدہ کارکردگی کی امید رکھتے ہوئے حوصلہ افزائی کی جائے۔بورڈ اجلاس میں ڈیلیوٹ یوسف عادل کمپنی کو پی سی بی کا ایکسٹرنل آ ڈیٹر مقرر کرنے کی منظوری دی گئی۔ آڈیٹر کمپنی پی سی بی کے گزشتہ مالی سال کے اخراجات کا آ ڈٹ کرے گی۔اجلاس میں ایم ڈی تقرری اور چیئر مین کے اختیارات کی منتقلی کی منظوری اور توثیق کی گئی۔ گورننگ بورڈ اراکین نے ایشیا کپ کی میزبانی ملنے پر چیئرمین پی سی بی کو مبارکباد دی۔