براڈ شیٹ کی تفصیلات سے ثابت ہوگیا نواز شریف نے قوم سے جھوٹ بولا: اسد عمر
اسلام آباد: وفاقی وزیر اسد عمر نے کہا ہے کہ براڈ شیٹ ایوارڈ کی تفصیلات سے ثابت ہو گیا کہ نواز شریف نے پارلیمنٹ، سپریم کورٹ اور قوم سے جھوٹ بولا۔
وفاقی وزیر اسد عمر کا اپنے ٹویٹس میں کہنا تھا کہ براڈ شیٹ ایوارڈ کی تفصیلات منظر عام پر آ گئی ہیں۔ ثالث نے بتا دیا کہ شریف خاندان 2000ء سے ایون فیلڈ اپارٹمنٹ کا مالک ہے۔
وفاقی وزیراسد عمر نے براڈ شیٹ سے متعلق فیصلے کو شیئر کرتے ہوئے کہا تھا کہ یہ ڈاکومنٹس پی ٹی آئی حکومت یا نیب کے نہیں لکھے ہوئے۔ یہ انگلینڈ کے جج نے لکھا ہے کہ شریف خاندان کی چھپائی ہوئی دولت جس میں لندن کے ایون فیلڈ فلیٹ شامل ہیں۔ ان کو ڈھونڈنے کا معاوضہ 20.5 ملین ڈالر بنتا ہے جس کا حقدار براڈ شیٹ ہے۔
اسد عمر کا کہنا تھا کہ شریف خاندان کی چھپائی ہوئی دولت 100 ملین ڈالر یعنی 16 ارب روپے ڈھونڈنے پر یہ 20 ملین معاوضہ ملا کیونکہ معاہدے کے مطابق 80 فیصد پاکستان اور 20 فیصد براڈ شیٹ کو حصہ ملنا تھا۔ 100 ملین ڈالر پاکستان کے عوام سے لوٹا اور اوپر 20 ملین ڈالر کا ہرجانہ کیونکہ شریف حکومت نے اثاثے واپس نہیں لئے۔
