بانی پی ٹی آئی کے خلاف سوشل میڈیا پر پوسٹیں، گلوکار سلمان احمد کی پارٹی رکنیت ختم 

اسلام آباد (نوائے وقت رپورٹ+اپنے سٹاف رپورٹر سے) بانی تحریک انصاف عمران خان کے خلاف سوشل میڈیا پوسٹیں کرنے پر گلوکار سلمان احمد کی پی ٹی آئی کی بنیادی رکنیت ختم کر دی گئی۔ چیئرمین پاکستان تحریک انصاف (پی ٹی آئی) بیرسٹر گوہر نے سلمان احمد کی بنیادی رکنیت ختم کرنے کا نوٹیفکیشن جاری کر دیا۔ نوٹس میں کہا گیا ہے کہ سلمان احمد سوشل میڈیا بیانات سے پارٹی قیادت اور ورکرز میں نفاق پیدا کرتے رہے، انہوں نے بانی پی ٹی آئی عمران خان اور اہل خانہ کے خلاف سوشل میڈیا پوسٹ کیں۔ پارٹی سلمان احمد کے بیانات سے اظہار لاتعلقی کرتی ہے اور ان کی پی ٹی آئی کی بنیادی رکنیت ختم کی جاتی ہے۔ وہ مستقبل میں پی ٹی آئی کا نام استعمال نہیں کر سکتے۔ چیئرمین پی ٹی آئی بیرسٹر گوہر نے بنیادی رکنیت ختم کی بیرسٹر گوہر نے کہا ہے کہ سلمان احمد نے بانی پی ٹی آئی اور ان کی اہلیہ سمیت پارٹی کیخلاف بیان بازی کی، سلمان احمد کسی طور پر پارٹی کی اب نمائندگی نہیں کر سکیں گے۔