سیالکوٹ(نامہ نگار) گورنمنٹ کالج وویمن یونیورسٹی اور خواجہ محمد صفدر میڈیکل کالج سیالکوٹ کے اشتراک سے” عورتوں کے چھاتی کے سرطان“ کے بارے میں آگاہی سیمینار کا انعقاد منعیم الدین آڈیٹوریم میں کیا گیا ۔مہمان خصوصی پرنسپل خواجہ محمدصفدر میڈیکل کالج سیالکوٹ ڈاکٹر ظفر علی چوہدری ،ڈین یونیورسٹی آف لاہور میڈیکل کالج پروفیسر اویس فاروقی، عذرا سبطین ، ایڈمن ڈائریکٹر قمرشہزاد گیلانی اورگائناکالوجسٹ ڈاکٹر نیلم طارق کے علاوہ کثیر تعداد میں طالبات نے شرکت کی ۔تقریب سے خطاب کرتے ہوئے مقررین نے کہاکہ پاکستان میں عورتوں میں چھاتی کا سرطان تیزی سے بڑھ رہا ہے اورایک اندازہ کے مطابق پاکستان میں ہر آٹھویں عورت چھاتی کے سرطان میں مبتلا ہے ۔ چھاتی کے سرطان سے بچنے کیلئے ضروری ہے کہ صرف مستند معالج سے باقاعدگی سے تشخیص کروائی جائے کیونکہ اس بیماری کاابتدائی مراحل میں علاج آسان ہے اور مریض مکمل صحت یاب ہوسکتا ہے جبکہ تشخیص میں تاخیر مریض کیلئے خطرناک ثابت ہوتی ہے اور علاج بھی انتہائی مشکل ہوجاتا ہے ۔