لاہور( کامرس رپورٹر  ) لاہور چیمبر آف کامرس اینڈ انڈسٹری اور پاکستان انٹرنیشنل ایئر لائنز نے ایک مفاہمتی یادداشت پر دستخط کیے ہیں جس کی رو سے دونوں ادارے باہمی تعاون کو فروغ دیں گے۔ پی آئی اے کے چیف ایگزیکٹو آفیسر ایئر مارشل ارشد ملک اورلاہور چیمبر کے صدر میاں طارق مصباح نے مفاہمتی یادداشت پر دستخط کیے جبکہ سینئر نائب صدر محمد ناصر حمید خان، نائب صدر طاہر منظور چودھری، سابق سینئر نائب صدر خواجہ خاور رشید، سابق نائب صدر میاں زاہد جاوید احمد اور ایگزیکٹو کمیٹی اراکین بھی اس موقع پر موجود تھے۔ ایئر مارشل ارشد ملک نے کہا کہ پی آئی اے کی بہتری کے لیے اٹھائے جانے والے اقدامات رنگ لارہے ہیںاور کرونا سمیت دیگر چیلنجز کے باوجود نمایاں بہتری آئی ہے۔ انہوں نے کہا کہ ماہ ستمبر اور اکتوبر کے درمیان پی آئی اے کا گراس پرافٹ بڑھا، بوئنگ 777ایئر کرافٹس کارگو کی ٹرانسپورٹیشن کے لیے بھی استعمال ہوسکتے ہیں۔ انہوں نے کہا کہ منافع بخش روٹس پر خصوصی توجہ دی جارہی ہے ۔ انہوں نے کہا کہ ماضی کے برعکس اب تمام فیصلے افہام و تفہیم سے کیے جارہے ہیںاور سیاسی مداخلت بالکل نہیں ہورہی ۔انہوں نے کہا کہ ایئرکرافٹس کو اپ گریڈ کرکے مسافروں کے لیے زیادہ سے زیادہ سہولیات کااجراءیقینی بنایا جارہا ہے۔ انہوں نے کہا کہ عملے کے لیے میرٹ بیسڈ پالیسی ہے جبکہ تین ہزار ملازمین کے لیے گولڈ شیک ہینڈ پالیسی متعارف کرائی جارہی ہے۔ اس موقع پر خطاب کرتے ہوئے لاہور چیمبر کے صدرمیاں طارق مصباح نے کہا کہ لاہور چیمبر پی آئی اے کے ساتھ بہترین کاروباری تعلقات کے فروغ کا خواہاں ہے تاکہ ممبران کو اندرون و بیرون ملک سفر کے لیے بہترین سہولیات میسر آسکیں۔ انہوں نے امید ظاہر کی کہ یہ مفاہمتی معاہدہ لاہور کی تاجر برادری کو طویل مدت تک سہولیات فراہم کرے گا۔ انہوں نے لاہور چیمبر کی تجویز پر پی آئی اے ہیلپ ڈیسک کے قیام کوسراہتے ہوئے کہا کہ یہ لاہور چیمبر کی سمارٹ سروسز کی فراہمی کے سلسلے میں یقینی طور پر ایک مفید اضافہ ثابت ہوگا۔انہوں نے کہا کہ کچھ پبلک سیکٹر انٹرپرائزز کی مایوس کن وجہ سے بجٹ پر اضافی مالی بوجھ پڑتا ہے جس پر تاجر برادری حکومت کو اپنے تحفظات ظاہر کررہی ہے،پی آئی اے کبھی منافع بخش ریاستی ادارہ تھا ، بعد ازاں حالات خراب ہوئے، توقع ہے کہ یہ پہلے کی طرح اپنے عروج پر آئےگا۔انہوں نے مزید ظاہر کرتے ہوئے کہا کہ ایئر مارشل ارشد ملک کی متحرک قیادت میں پی آئی اے کی بہترین تنظیم نو ہوگی۔سینئر نائب صدر محمد ناصر حمید خان اور نائب صدر طاہر منظور چودھری نے کہا کہ لاہور چیمبر آف کامرس اینڈ انڈسٹری نے پہلے ہی مختلف سرکاری محکموں کے کئی اہم ہیلپ ڈیسک کو ایک ہی چھت کے نیچے قائم کیا ہے،جس کا بنیادی مقصد اپنے ممبروں کی خدمت کرنا اور ان کے لئے کاروباری آسانیاں پیدا کرنا ہے۔

 شہری دوران سفر ضروری دستاویزات ہمراہ رکھیں ، ایس ایس پی آپریشنز