انسداد پتنگ بازی ایکٹ کی خلاف ورزی‘ رواں سال 3375 ملزم گرفتار

لاہور(نامہ نگار)انسپکٹر جنرل پولیس پنجاب ڈاکٹر عثمان کی ہدایت پر صوبہ بھر میں اینٹی کائٹ فلائنگ ایکٹ کی خلاف ورزی پر کاروائیاں جاری ہیں۔ رواں سال لاہور سمیت صوبہ بھر میں انسداد پتنگ بازی ایکٹ کی خلاف ورزی پر 3375 ملزمان گرفتار کر کے 3301 مقدمات درج کئے گئے۔4 لاکھ 46 ہزار 506 پتنگیں، 15 ہزار 888 ڈور کی چرخیاں برآمد کی گئیں اور 3060 کیسز کے چالان جمع کروائے گئے۔ لاہور میں 1010 ملزمان گرفتار، 991 مقدمات درج، 24824 پتنگیں اور 1168 ڈور کی چرخیاں برآمد کی گئیں۔ آئی جی پنجاب نے کہا کہ پتنگ بازی ممانعت ترمیمی بل کے قانون پر سختی سے عملدرآمد یقینی بنائیں۔ آر پی اوز، سی پی اوز، ڈی پی اوز پتنگ بازوں، پتنگ فروشوں اور مینوفیکچررز کیخلاف کریک ڈاؤن میں تیزی لائیں۔ جان لیوا سرگرمی کی ہرگز اجازت نہیں اور خونی دھندے میں ملوث افراد کے خلاف زیرو ٹالرنس پالیسی اپنائیں۔ دھاتی ڈور اور پتنگوں کے آن لائن کاروبار میں ملوث عناصر کو بھی قانون کی گرفت میں لایا جائے۔والدین اپنے بچوں کو اس خونی کھیل سے دور رکھیں اور شہری کسی بھی مقام پر پتنگ بازی کی صورت میں 15 پر اطلاع دے کر ذمہ داری کا ثبوت دیں۔