یقین تھا پاکستان کی طرف سے ضرور کھیلوں گا: احسان اللہ
لاہور (سپورٹس رپورٹر ) ملتان سلطانز کے فاسٹ بائولراحسان اللہ نے کہاہے کہ شروع سے یقین تھا کہ میں پاکستان کی طرف سے ضرور کھیلوں گا۔ اللہ کا شکر ادا کرتا ہوں کہ پاکستان سپرلیگ میں پرفارمنس اچھی ہوئی اور پاکستان ٹیم میں شامل کر لیا گیا، افغانستان کیخلاف موقع ملا تو اس سیریز میں بھی پرفارم کروں گا۔ ڈومیسٹک سمیت مجھے جہاں بھی موقع ملا میں نے پرفارم کیا، اب پاکستان کی طرف بھی سے پرفارم کرنیکا عزم ہے۔ تسلسل کیساتھ تیز رفتاری کیساتھ بائولنگ کرنے کے بارے میں فاسٹ بائولر نے کہا کہ فزیو ٹرینر اور ڈاکٹر سمیت ہماری جو مینجمنٹ ہے وہ میرا بہت خیال رکھتی ہے، میرے تسلسل کیساتھ ایک ہی رفتار سے بائولنگ کرنے کی وجہ یہ ہے کہ مینجمنٹ مجھے سٹف نہیں ہونے دیتی‘ انجرڈ نہیں ہو نے دیتی، میری خوراک کا خیال رکھا جاتا ہے۔ میں اپنا سارا کریڈٹ کپتان محمد رضوان،کوچ عبدالرحمان اور حیدر اظہر کو دیتا ہوں، محمد رضوان ڈانٹتے نہیں ہیں،کوئٹہ کیخلاف مجھ سے کیچ بھی ڈراپ ہوگیا تو مجھے کہا کہ فکر نہ کرو آپ کرسکتے ہو، محمد رضوان کی وجہ سے مجھے حوصلہ ملتا ہے۔ احسان اللہ نے اپنے اگلے ہدف کے بارے میں کہا کہ میں اب ورلڈکپ کھیلنے کیلئے پاکستان ٹیم میں اپنا نام پکا کروں گا۔
