کراچی کا کوئی دوست نہیں ہمیں اس سے دوستی کا ثبوت دینا ہوگا،کامران ٹیسوری
کراچی (اسٹاف رپورٹر)گورنر سندھ محمد کامران خان ٹیسوری نے کہا ہے کہ کراچی کا کوئی دوست نہیں ہے، ہمیں خود اس شہر کا دوست بننا پڑے گا، معیشت کا حب ہوتے ہوئے اس شہر کا کوئی پرسان حال نہیں ہے، ٹوٹے ہوئے دل کی طرح اس سڑکیں بھی ٹوٹی ہوئی ہیں، کراچی اور اس کا انفرا اسٹرکچر سو سال پیچھے چلا گیا ہے، لیکن ہمیں ہمت نہیں ہارنی ہے اس شہر کے لئے جہاں جانا پڑا جائیں گے اور مجرموں کا شہر بنانے کے بجائے روشنیوں کا شہر بنائیں گے، ان خیالات کااظہار انہوں نے برنس گارڈن میں موسمی پھولوں کی نمائش کا افتتاح کرتے ہوئے کہی، ایڈمنسٹریٹر کر اچی ڈاکٹر سید سیف الرحمن، میونسپل کمشنر سید شجاعت حسین، ڈائریکٹر جنرل پارکس جنید اللہ خان، کے ایم سی کے محکمہ جاتی سربراہان کے علاوہ شہریوں کی ایک بڑی تعداد بھی موجود تھی، گورنر سندھ نے کہا کہ کراچی میں اب کسی مافیا کو قدم نہیں جمانے دیں گے، اور ان کے خلاف ڈٹ کر لڑیں گے، انہوں نے کہا کہ آج ایک اور تاریخی پارک کو بحال کردیا ہے، برنس گارڈن 1927 میں تعمیر کیا گیا تھا اب ہم تاریخی چیزوں کے ساتھ ساتھ نئے پارک بھی تعمیر کررہے ہیں، باغ کراچی اور پاک چائنا
فرینڈ شپ پارکوں کی تعمیر جاری ہے، برنس گارڈن اس سے پہلے اجاڑ پڑا ہوا تھا، ایڈمنسٹریٹر کراچی اور کے ایم سی کے افسران و عملے کی انتھک محنت سے اسے عوام کے لئے کھول دیا ہے، انہو ں نے کہا کہ ہم کس سمت جارہے ہیں ہمیں کہاں لے جا کر چھوڑ دیا گیا ہے اور ایسی جگہ پر کھڑا کردیا گیا ہے کہ اگر ذرا سا پاں پھیلائیں تو سر ننگا ہوتا ہے، گورنر سندھ نے کہا کہ مہنگائی نے سب کو لپیٹ میں لے لیا ہے انہوں نے کہا کہ لوگ مہنگائی کا مقابلہ نہیں کرپارہے اور کراچی میں گزشتہ روز بیوی بچوں سمیت خودکشی کا جو واقعہ ہوا ہے وہ انتہائی افسوس ناک ہے، انہوں نے کہا کہ ہمیں وہ قرض بھی ادا کرنے پڑ رہے ہیں جو ہم پر واجب نہیں تھے اور ہر پاکستانی کے نام پر آئی ایم ایف سے اتنا قرضہ لے لیاگیا ہے کہ اسے اتارنا انتہائی مشکل ترین کام ہے، انہوں نے کہا کہ ہمیں 40فیصد رقم آئی ایم ایف کے قرض ادا کرنے میں دینی پڑتی ہے، انہوں نے کہا کہ بجلی کے بل میں بھی ہر شہری کو آئی ایم ایف کی رقم ادا کرنی پڑتی ہے، انہوں نے کہا کہ امیر، امیر تر اور غریب، غریب تر ہوتا جارہا ہے، انہوں نے کہا کہ اب ایک عام شخص ہاتھ پھیلانے پر مجبور ہے، ہم نے اگر ہوش کے ناخن نہ لیے تو پاکستانی غربت، افلاس، مہنگائی اور بے روزگاری کے دلدل میں مزید دھنستے چلے جائیں گے، جس کے نتائج بھیانک ہوسکتے ہیں، ایڈمنسٹریٹر کراچی ڈاکٹر سید سیف الرحمن نے کہا کہ موسمی پھولوں کی نمائش کا مقصد شہریوں کو قدرتی حسن سے آگاہ کرنا اللہ تعالی کی عطا کردہ نعمتوں کااظہار ہے، اس نمائش میں جو پھول رکھے گئے ہیں وہ دو ماہ تک اپنی بہار دیکھا تے ہیں، لیکن ان پھولوں کے پودوں کی پرورش پورے سال کی جاتی ہے انہوں نے کہا کہ یہ سارے پھول کے ایم سی کی نرسری میں تیار کئے گئے ہیں ایڈمنسٹریٹر کراچی نے شہریوں کو دعوت دی کہ وہ برنس گارڈن آئیں اور پھولوں کی اس نمائش سے لطف اندوز ہوں۔
