لاہور (خصوصی رپورٹر) سابق وزیراعظم اور مسلم لیگ (ن) کے قائد میاں نوازشریف نے کہا ہے کہ پاکستانی قوم نے 18 فروری کو ووٹ کے ذریعے پرامن جمہوری انقلاب کی بنیاد رکھ دی تھی لیکن وہ ابھی تک تبدیلی کی راہ تک رہی ہے۔ ان خیالات کا اظہار انہوں نے گزشتہ روز الیکشن 2008ءکی ایک سالہ مدت پوری ہونے پر اپنے پیغام میں کیا۔ انہوں نے عوام کے جمہوری عمل پر اعتماد کو قائم رکھنے کے لئے امید ظاہر کی کہ اُس ایجنڈے پر عمل کیا جائے جس کی پشت پناہی قوم نے 18 فروری 2008ءکو ووٹ دے کر کی تھی۔