برٹس ایئرویزکی 10 سال بعد پاکستان کیلئے پروازیں بحال
اسلام آباد (این این آئی+ آئی این پی) برٹش ائرویز نے 10 سال بعد پاکستان کے لیے دوبارہ پروازیں بحال کرنے کا اعلان کردیا ہے۔ یہ اعلان برٹش ائرویز کے نمائندوں نے یہاں وزیراعظم کے معاون خصوصی برائے سمندر پار پاکستانی زلفی بخاری کے ہمراہ پریس کانفرنس کرتے ہوئے کیا۔ اس موقع پر قائم مقام برطانوی ہائی کمشنر رچرڈ کراؤڈر، وزیراعظم کے مشیر تجارت عبدالرزاق داؤد بھی موجود تھے۔ برٹش ائرویز حکام نے کہا کہ آئندہ سال جون سے فلائٹ آپریشن شروع ہوگا اور برٹش ائرویز اسلام آباد سے ہیتھرو کے لیے فلائٹ آپریٹ کرے گی۔ برٹش ائرویز کے نمائندوں کے مطابق برٹش ائر ویز ہفتے میں تین فلائٹ آپریٹ کریگی، دو طرفہ ٹکٹ 499 پاؤنڈ میں دستیاب ہوگا۔ برٹش ائرویز کے نمائندوں نے کہا کہ پاکستان میں فضائی آپریشن کے لیے تھری کلاس 787 ڈریم لائن طیارے استعمال کیے جائیں گے۔ نمائندہ برٹش کا پریس کانفرنس کے دوران کہنا تھا کہ برطانیہ میں ڈیڑھ ملین لوگوں کی جڑیں پاکستان میں ہیں۔ پاکستان آرمی اور عوام نے دہشت گردی کے خلاف بہت قربانیاں دی ہیں۔ اس موقع پر وزیراعظم کے مشیر برائے تجارت عبدالرزاق داؤد نے کہا کہ ہم زیادہ سے زیادہ برطانوی تجارت اور سرمایہ کاری پاکستان میں چاہتے ہیں۔ اسلام آباد ائر پورٹ سے جڑواں شہروں تک ٹرانسپورٹ سسٹم کو بہتر بنایا جائے گا اور ائر پورٹ تک ٹرانسپورٹ کی ناقص سہولیات کے بارے میں وزیراعظم کو آگاہ کیا جائیگا۔ نمائندہ برٹش ائر ویز نے کہا کہ پاکستان کی ثقافت بہت مشہور ہے اور یہ خوبصورت ملک ہے۔ پاکستان میں سکیورٹی صورتحال بہتر ہونے پر کمپنی نے فلائٹ آپریشن بحال کرنے کا فیصلہ کیا ہے۔ اس موقع پر قائم مقام برطانوی ہائی کمشنر رچرڈ کراؤڈر نے کہا کہ برطانیہ پاکستان میں تیسرا بڑا سرمایہ کار ہے۔ دونوں ممالک کے تعلقات بہت خاص ہیں۔ برطانیہ میں 15 لاکھ لوگوں کی آبائی جڑیں پاکستان میں ہیں۔ پاک فوج اورعوام نے دہشت گردی کے خلاف بہت قربانیاں دی ہیں۔ پاکستان میں سکیورٹی صورتحال بہت بہتر ہو گئی ہے۔ پاکستان کی معیشت ترقی کر رہی ہے۔ پریس کانفرنس کے دوران وزیراعظم کے معاون خصوصی زلفی بخاری نے کہا کہ برٹش ائرویز کی جانب سے پاکستان کے لیے پروازیں دوبارہ بحال کرنے کا خیرمقدم کرتے ہیں اور ہم چاہتے ہیں کہ پاکستان کا رابطہ دنیا بھر سے قائم رہے۔ یاد رہے کہ برٹش ائرویز نے 2008 میں اسلام آباد میں میرئیٹ ہوٹل پر بم دھماکے کے بعد پاکستان کے لیے فضائی آپریشن بند کردیا تھا۔ برطانوی ہائی کمشنر تھامس ڈریو نے کہا ہے کہ پاکستان اور برطانیہ کے درمیان ڈائریکٹ لنک کھلنے سے یہ بات واضح ہے کہ پاکستان میں امن و امان کی صورتحال بہتر ہوگئی ہے۔ میں جون 2019 میں برٹش ایئرویز کے پہلے طیارے کی آمد کا منتظر رہوں گا۔ ٹوئٹر پر اپنے پیغام میں برطانوی ہائی کمشنر نے کہا کہ مجھے برٹش ائرویز کی دس سال بعد پاکستان واپسی پر بے حد خوشی ہورہی ہے۔ اس اقدام سے دونوں ممالک کے تجارتی تعلقات مزید مضبوط ہوں گے۔