ڈھاکہ(سپورٹس ڈیسک )سابق کپتان شاہد آفریدی نے بنگلہ دیش کو اپنا دوسرا گھر قرار دیدیا۔بنگلہ دیش پریمیئر لیگ میں ڈھاکہ ڈائنامائٹس کی نمائندگی کرنے والے پاکستانی آل راؤنڈر نے ’’گلی کرکٹ‘‘ کے فروغ کیلئے تاریخی مقام لال باغ کا دورہ کیا جہاں انہوں نے آفیشلز اور آرگنائزرز کی ٹیم کے خلاف میچ بھی کھیلا جس کے بعد پلیئرز نے مداحوں میں ٹیم کی جرسیاں، کیپس اور بیٹ تقسیم کیے۔اس موقع پربوم بوم آفریدی نے کہا کہ بنگلہ دیشی مداحوں کی جانب سے ملنے والی محبت، عزت اور سپورٹ کے باعث بنگلہ دیش کو اپنا دوسرا گھر قرار دیتا ہوں، ہر بار یہاں آ کر کھیلنے میں لطف آتا ہے۔ میرے خیال سے تمام بڑے بڑے سٹار پلیئرز نے گلی سے ہی کرکٹ کھیلنا شروع کیا، کرکٹ صرف ایک کھیل نہیں بلکہ یہ ایک سماجی سرگرمی بھی ہے جہاں بہت سے مداح اپنے پسندیدہ پلیئرز کو اپنے درمیان دیکھنا چاہتے ہیں۔