ترمیمی ایکٹ واپس لینے پر حکومت کا شکریہ،بزنس کمیونٹی کی بڑی کامیابی قرار 

لاہور(کامرس رپورٹر) لاہور چیمبر آف کامرس اینڈ انڈسٹری نے حکومت پاکستان کی جانب سے ٹریڈ آرگنائزیشنز (ترمیمی) ایکٹ 2025 میں کی گئی متنازعہ ترامیم واپس لینے پر شکریہ ادا کیا ہے اور اس فیصلے کو بزنس کمیونٹی کی بڑی کامیابی قرار دیا ہے۔لاہور چیمبر کے صدر میاں ابوذر شاد، سینئر نائب صدر انجینئر خالد عثمان اور نائب صدر شاہد نذیر چوہدری نے لاہور چیمبر میں پریس کانفرنس سے خطاب کرتے ہوئے حکومت کے اس فیصلے کو خوش آئند قرار دیا۔میاں ابوذر شاد نے بتایا کہ اب ملک بھر کے چیمبرز آف کامرس اور تجارتی تنظیموں کے انتخابات 2026 میں ہی ہونگے۔ لاہور چیمبر وہ پہلا ادارہ تھا جس نے ان ترامیم کیخلاف سب سے پہلے آواز بلند کی۔ 20 فروری کو اجلاس بلا کر ان ترامیم کیخلاف باضابطہ تحریک کا آغاز کیا گیا۔ ہم حکومت کے شکر گزار ہیں کہ انہوں نے لاہور چیمبر کا مؤقف تسلیم کیا۔ انہوں نے اس بات پر زور دیا کہ لاہور چیمبر ہمیشہ تاجروں اور صنعتکاروں کے مفادات کا دفاع کرتا آیا ہے۔ مستقبل میں کاروبار سے متعلق کوئی بھی قانون سازی چیمبرز آف کامرس کی مشاورت سے ہونی چاہیے اور چیمبرز کو پالیسی سازی میں فعال شراکت دار بنایا جانا چاہیے۔میاں ابوذر شاد نے میڈیا کا بھی شکریہ ادا کیا اس نے لاہور چیمبر کا مؤقف عوام اور حکومت تک پہنچانے میں کلیدی کردار ادا کیا۔