دنیا ماڈرن ڈے کرکٹ کے حساب سے بہت آگے نکل گئی : محمد حارث 

لاہور(سپورٹس رپورٹر)پشاور زلمی کے وکٹ کیپر بیٹر محمد حارث نے کہا ہے کہ پاکستان کی نسبت دنیا ماڈرن ڈے کرکٹ کے حساب سے بہت آگے نکل گئی ہے۔ بطور بیٹرز اور ٹیم ماڈرن ڈے کرکٹ کے پیشِ نظر پاکستان پیچھے ہے، لیکن میں ماڈرن ڈے کرکٹ کو مدِ نظر رکھتے ہوئے ہی پریکٹس کرتا ہوں۔ ماڈرن ڈے کرکٹ کو کیسے اپنانا ہے، اسی پر کوچز سے بات ہوتی رہتی ہے، میرا ٹارگٹ ہے کہ مستقبل کے ایونٹس میں ماڈرن ڈے کرکٹ کے حساب سے کھیلوں۔ قومی ٹیم بھی اگر ماڈرن ڈے کرکٹ کے حساب سے کھیلے گی تو مشکلات کا سامنا نہیں ہوگا۔ کسی بھی بیٹر کیلئے بیٹنگ نمبر بہت ضروری ہوتا ہے، لیکن مجھے کسی بھی بیٹنگ پوزیشن پر بیٹنگ کا موقع ملے تو تیار رہتا ہوں، مجھے مختلف نمبروں پر بیٹنگ کرنے میں کوئی مسئلہ نہیں، میرا مقصد ٹیم کیلئے پرفارمنس دینا ہوتا ہے۔ بابر اعظم سمیت سینئر کھلاڑیوں سے بیٹنگ کے مختلف پہلوں پر سیکھتا رہتا ہوں۔ البتہ سینئر کھلاڑی جتنا بھی سمجھا لیں لیکن محنت کھلاڑی نے انفرادی طور پر خود کرنی ہوتی ہے۔ جتنا بھی بڑا بائولر یا بیٹر کیوں نا ہو، میچ میں پریشر دونوں اطراف ہوتا ہے۔ کبھی کامیابی ملتی ہے تو کبھی نہیں، لیکن میرا ہدف اپنی شاٹس کے ذریعے بائولر پر پہلے حاوی ہونا ہوتا ہے، کھلاڑی کا اعتماد بہت ضروری ہے، اعتماد ہوگا تو پرفارمنس بھی ملے گی۔ خیبر پی کے کے کھلاڑیوں کا زیادہ قومی ٹیم میں آنے کا راز صرف محنت ہے، خیبر پی کے کے کھلاڑی کلب سے لے کر ڈومیسٹک کرکٹ تک تسلسل کیساتھ کرکٹ کھیلتے ہیں۔بیٹنگ تکنیک پر بات کرتے ہوئے انہوں نے کہا کہ ٹی ٹونٹی میں بیٹنگ کی تکنیک اہم ہوتی ہے، تکنیک مختلف صورتحال میں کھیلنا آسان بنا دیتی ہے۔