ٹی ٹونٹی ورلڈ کپ، 15 رکنی قومی سکواڈ فائنل، انشاء اللہ جیتیں  گے: شاہین آفریدی

لاہور (سپورٹس رپورٹر ) آئی سی سی ٹی 20 ورلڈ کپ کیلئے پاکستان کے 15 کھلاڑیوں کے نام فائنل ہوگئے۔ ذرائع کے مطابق پاکستانی سکواڈ میں 5 فاسٹ بائولرز، 4 آل راونڈرز، 3 وکٹ کیپرز، 2 بیٹرز اور ایک سپنر شامل ہوگا۔ ذرائع کا کہنا ہے کہ شاداب خان، صائم ایوب اور عثمان خان ٹیم میں شامل ہونگے جبکہ حارث رئوف مکمل فٹ ہیں اور وہ بھی ورلڈ کپ کے سکواڈ کا حصہ ہوں گے۔ ذرائع کے مطابق بابر اعظم(کپتان )، فخر زمان، محمد رضوان، اعظم خان، عماد وسیم، افتخار احمد بھی سکواڈ میں شامل ہونگے۔ابرار احمد، شاہین شاہ آفریدی، محمد عامر، نسیم شاہ، عباس آفریدی بھی پاکستانی سکواڈ کا حصہ ہونگے۔ 3 ٹریول ریزروز میں سلمان علی آغا، حسن علی اور عرفان نیازی شامل ہونگے۔ فاسٹ بائولر شاہین شاہ آفریدی نے کہا کہ ٹی ٹونٹی ورلڈ کپ میں پاکستان کو فاتح دیکھنا چاہتے ہیں۔ وہ اسوقت مکمل فٹ ہیں اور ٹی ٹونٹی ورلڈ کپ کیلئے پوری طرح تیار ہیں ۔ انہیں اچھے نتائج کا یقین ہے۔ ہم بھی لوگوں کو یہ کہہ کہہ کر تھک گئے ہیں کہ ورلڈ کپ جیتیں گے لیکن انشاء اللہ اس مرتبہ یہ کر کے دکھائیں گے۔ گیری کرسٹن نے ان سے یہ زبردست بات کہی کہ کہ آپ کی شرٹ کے پیچھے جو نام ہے اس کے لیے نہیں کھیلنا بلکہ شرٹ کے آگے سینے پر جو نام ہے اس کیلئے کھیلنا ہے ۔ یہ نہ صرف موجودہ بلکہ آنیوالے کرکٹرز کیلئے بھی بہت اہم پیغام ہے۔  ٹیم کا ماحول بہت اچھا ہے اور ہمارا کام کرکٹ کھیلنا اور قوم کو خوشیاں دینا ہے۔یہ وقت کسی بحث کا نہیں بلکہ اصل مقصد کے حصول کا ہے۔وہ کوشش کرینگے کہ ٹیم ان سے جو توقعات وابستہ کیے ہوئے ہے اس پر پورا اتریں۔ قوم ہم سے بہت پیار کرتی ہے اور سب لوگ یہی چاہتے ہیں کہ ہم جیتیں۔ 2019ء کے عالمی کپ میں بنگلہ دیش کیخلاف لارڈز پر چھ وکٹوں کی کارکردگی پر انہیں فخر محسوس ہوتا ہے جبکہ  2021کے ٹی ٹونٹی ورلڈ کپ اور پھر 2023کے ایشیا کپ میں دونوں مرتبہ بھارت کیخلاف بائولنگ ان کے یادگار میچز ہیں۔ 2022 کے ٹی ٹونٹی ورلڈ کپ فائنل میں انجری کے سبب وہ ٹیم کا ساتھ نہ دے پائے جس کا انہیں بے حد افسوس ہے۔ اسی ورلڈ کپ میں زمبابوے کیخلاف شکست بھی ان کیلئے بڑی تکلیف دہ تھی۔ سری لنکا کیخلاف ٹیسٹ میچ میں انجری کے بعد کا وقت بہت مشکل تھا ۔ خاص کر اسوقت جب ٹیم کھیل رہی ہو اور آپ کھیلنے کے قابل نہ ہوں تو زیادہ تکلیف محسوس ہوتی ہے۔ وہ خود کو خوش قسمت سمجھتے ہیں کہ کم عمری اور کم عرصے میں انہیں پاکستان کی نمائندگی کا موقع مل گیا ۔ سابق کپتان سرفراز احمد کے بارے میں کہا کہ انہوں نے ان کی بڑی رہنمائی کی ۔ ان کے بڑے بھائی ریاض آفریدی نے جو خود بھی ٹیسٹ کرکٹر رہ چکے ہیں ان کی کوچنگ میں اہم کردار ادا کیا ہے۔ وہ پیار کرنیوالے بھائی لیکن سخت کوچ ہیں جبکہ ایک اور بھائی نے انہیں کرکٹر بنوانے کیلئے اپنی کرکٹ چھوڑدی۔ ان کے والد پولیس میں رہے ہیں اور ایک بم دھماکے میں شدید زخمی ہوگئے تھے اب ایک بڑے بھائی پولیس میں ہیں اس لحاظ سے ہمارا فیملی پس منظر ملک کی خدمت کے جذبے سے سرشار ہے۔ انہوں نے کہا کہ آج کل کرکٹ بہت زیادہ ہوگئی ہے لیکن جب بھی وقفہ آتا ہے تو وہ کوشش کرتے ہیں کہ فیملی کیساتھ زیادہ سے زیادہ وقت گزاریں۔