اسلام آباد میں کابینہ کے اجلاس سے متعلق بریفنگ دیتے ہوئے اطلاعات ونشریات کے بارے میں وزیراعظم کی معاون خصوصی ڈاکٹر فردوس عاشق اعوان نے کہا کہ وزیراعظم عمران خان نے کابینہ کو ان تمام اقدامات کے بارے میں بتایا جو انہوں نے ملک کو درپیش موجودہ اقتصادی مسائل کے پیش نظر کفایت شعاری کیلئے اٹھائے ہیں۔

انہوں نے کہا کہ کابینہ کے ارکان کو سادہ طرز زندگی اختیار کرکے دوسروں کیلئے مثال قائم کرنی چاہئے۔ڈاکٹر فردوس عاشق اعوان نے کہا کہ آج کے اجلاس میں ملک کے لئے لائحہ عمل پر غور ہوا ، لوگوں کو درپیش مشکلات کا ادراک کیا گیا اور ان کی توقعات پر پورا اترنے پر غور کیا گیا جنہوں نے پاکستان تحریک انصاف کو ووٹ دیا۔

فردوس عاشق اعوان نے کہا کہ ذرائع ابلاغ نے نئے بجٹ میں وزیراعظم ہائوس کیلئے مختص رقم سے متعلق درست اطلاعات فراہم نہیں کیں ۔ انہوں نے کہا کہ وزیراعظم ہائوس کا گزشتہ بجٹ ایک ارب دس کروڑ روپے تھا۔موجودہ حکومت نے اس میں 75 کروڑ روپے خرچ کئے اور 32 فیصد رقم کی بچت کی۔معاون خصوصی نے کہا کہ بجٹ 20-2019 میں وزیراعظم ہائوس کے اخراجات میں 13 فیصد کٹوتی ہوچکی ہے۔

انہوں نے کہا کہ موجودہ حکومت سابقہ حکومت کی جانب سے بجلی کے واجب الادا بلوں کی صورت میں 28 کروڑ روپے کی رقم ادا کررہی ہے۔

قومی اسمبلی میں حزب اختلاف کے کردار پر نکتہ چینی کرتے ہوئے انہوں نے کہا کہ بجٹ پر حزب ختلاف کی غیر ضروری تنقید غیر منطقی ہے۔

انہوں نے قومی اسمبلی کے سپیکر کو ان کے چیمبر میں محصور کرنے پر بھی تنقید کی ۔جرم کی تشہیر کی اجازت نہیں دی جائے گی اور وزرائے اعلیٰ کو ہدایت کی گئی ہے کہ مجرموں کی عدالتوں میں پیشی کے موقع پر پروٹوکول کی حوصلہ شکنی کی جائے۔انہوں نے کہا کہ پروڈکشن آرڈر جاری کرنا سپیکر قومی اسمبلی کی صوابدید ہے اور انہیں میرٹ پر فیصلہ کرنا چاہئے۔

معاون خصوصی نے کہا کہ گزشتہ حکومت کی مدت میں وزیر ریلوے شیخ رشید احمد کا پروڈکشن آرڈر جاری نہیں کیا گیا تھا حالانکہ ان کے خلاف کوئی مقدمہ نہیں تھا۔

وزیراعظم نے کابینہ کو بتایا کہ وہ وزیرخارجہ شاہ محمود قریشی کے ہمراہ ستمبر میں نیویارک میں اقوام متحدہ کی جنرل اسمبلی کے اجلاس میں شرکت کے موقع پر بچت مہم کے حصے کے طور پر پاکستانی سفیر کی رہائش گاہ پر قیام کریں گے۔کابینہ کو بتایا گیا کہ مختلف سرکاری شعبوں کے 157 ریسٹ ہائوس ہیں۔اس کے علاوہ پی ٹی ڈی سی کے موٹلز اور این ایچ اے ریسٹ ہائوسز کو بھی عوام کیلئے کھول دیا جائے گا۔