سپیکر پنجاب اسمبلی چودھری پرویز الٰہی نے کہا ہے کہ ملک کو آگے لیجانے کے لیے عمران خان کے علاوہ کوئی چوائس نہیں ۔ عثمان بزدار ہمارے وزیر اعلیٰ ہیں وہ بڑے کم گو مگر صاف گو ہیں۔ ہماری اتحادی حکومت ہے۔ ہم ان کا بھرپور ساتھ دے رہے ہیں اور دیتے رہیں گے۔ ہماری وزارت اعلیٰ کے دور میں 100ارب روپے سرپلس تھے ۔ میاں برادران  اللہ تعالیٰ کی پکڑ میں ہیں انہوں نے ملک دیوالیہ کر دیا۔ سستی روٹی سکیم، دانش سکول سسٹم اور صاف پانی سمیت ان کے تمام منصوبے  فلاپ ہو چکے ہیں۔ ہم نے صحت کارڈ جاری کرنے کی بجائے عوام کو فری ادویات فراہم کی تھیں۔ صحافی برادری نے ہر نازک موڑ پر ملک و قوم کی بھلائی کے لیے ہر طرح کی قربانیاں دی ہیں۔ان خیالات کا اظہار انہوں نے پنجاب اسمبلی کی پریس گیلری کے نومنتخب عہدیداران کی تقریب حلف برداری سے خطاب کرتے ہوئے کیا۔ حلف برداری کی پروقار تقریب پنجاب اسمبلی کے کیفے ٹیریا میں منعقد ہوئی ۔تقریب میں وزیر قانون محمد بشارت راجا، اراکین اسمبلی ، پریس گیلری کمیٹی کے ممبران،صدر لاہور پریس کلب ارشد انصاری، سیکرٹری پنجاب اسمبلی محمد خاں بھٹی، ڈی جی پارلیمانی امور عنایت اللہ لک اور اسمبلی کے دیگرافسران نے بھی شرکت کی۔سپیکر نے مزیدکہا کہ حمزہ کے تایا نے مرکز میں اور اس کے ابا نے جو صوبے میں کیا ہے ایسا تو کوئی دشمن بھی نہیں کرتا ۔ سچ کی خاطر جان کا نذرانہ پیش کرنے والے صحافیوں کو سلام پیش کرتا ہوں۔انہوں نے کہا کہ  ہمارے دور کے ریسکیو 1122، کارڈک ہسپتال اور دیگر تمام ادارے چل رہے ہیں۔ چودھری پرویز الٰہی نے کہا کہ صحافی عوامی نمائیندوں اور عوام کے درمیان موثر رابطہ میں بھر پور کردار ادا کرتے ہیں۔انہوں نے کہا کہ ہمیں اپنے ان تمام صحافی بھائیوں اور بہنوں پر فخر ہے جنہوں نے استحکام پاکستان کے لئے اپناکردار بخوبی ادا کیا اور اپنے قلم کے ذریعے جہاد جاری رکھے ہوئے ہیں ۔ انہوں نے کہا کہ بجٹ پاس کروالیں گے ۔پریس گیلری کمیٹی کے صدر نے کہا کہ چودھری پرویز لٰہی نے ہمیشہ صحافیوں کی فلاح و بہبود کا خیال رکھا ہے جس کے لیے ہم ان کے تہہ دل سے شکر گزار ہیں۔ بعد ازاں چودھری پرویز الٰہی نے پریس گیلری کے اعزاز میں ظہرانہ دیا۔

 بچوں کو ماں کا دودھ پلانے کی مہم کو موثر بنانے کی ضرورت ، ڈاکٹر فیصل سلطان