لاہور (نوائے وقت رپورٹ) وزیر قانون پنجاب رانا ثنا نے چودھری نثار کے نوازشریف سے شکوہ پر چودھری نثار سے شکوہ کیا ہے۔ نجی ٹی وی سے گفتگو کرتے انہوں نے کہا مجھے بھی ایک معاملہ پر چودھری نثار سے شکایت تھی مگر اس کا تذکرہ صرف چودھری نثار سے کیا تھا، پارٹی میں اختلاف رائے کا احترام کرنا چاہئے۔ چودھری نثار کے اختلاف رائے کے حق کو تسلیم کرتے ہیں، پارٹی میں اختلاف رائے کے حق کو برداشت بھی کرنا چاہئے۔ اختلاف رائے کے اظہار کو پارٹی میں مسائل قرار دینا غلط ہے جس کی بات سنی جائے اسے خوشامدی سمجھا جاتا ہے۔ چودھری نثار نے میرا مسئلہ حل کرنے کا وعدہ بھی کیا تھا لیکن شکایت صرف ان سے کروں گا، چودھری نثار میرے معاملے میں کردار ادا کر سکتے تھے میں نے شواہد ان کے سامنے رکھے تھے کہ میرے ساتھ زیادتی کرنے کی کوشش کی گئی ہے۔ میری شکایت کسی ادارے کے حوالے سے نہیں تھی تمام ادارے ملک کے ساتھ مخلص ہیں کسی ادارے سے کوئی اختلاف نہیں اداروں میں اچھے برے لوگ ہوتے ہیں۔