آسٹریلین جونیئر اوپن سکواش ‘پاکستان نے 4گولڈ سمیت 5میڈل جیت لئے 

لاہور(سپورٹس رپورٹر)علی سسٹرز سمیت پانچ پاکستانی کھلاڑیوں نے آسٹریلین جونیئر اوپن سکواش چیمپئن شپ کے مختلف ایونٹس کے فائنلز میں عمدہ کھیل پیش کرتے ہوئے چار گولڈ میڈلز اور ایک سلور میڈل جیت لیا۔ میلبورن میں منعقدہ آسٹریلین جونیئر اوپن سکواش چیمپئن شپ کے مختلف ایونٹس کے فائنل میں رسائی پانے والے پاکستان کے 5 سے 4 کھلاڑی فتح سے ہمکنار ہوئے۔پشاور سے تعلق رکھنے والی علی سسٹرز کے نام سے معروف تین میں سے دو بہنیں چیمپئن بن گئیں، فائنل جیتنے والے چاروں پاکستانی کھلاڑیوں نے کوئی گیم ہارے بغیر 0-3 کے یکساں سکور سے فتوحات اپنے نام کیں۔گرلز انڈر 17 کے فائنل میں ٹاپ سیڈ مہوش علی نے نیو ساؤتھ ویلز کی ریڈن الما پائولاوا کو شکست دی اور گرلز انڈر 13 کے فائنل ٹاپ سیڈ ماہ نورعلی نے کوئنز لینڈ کی ریو کوا باٹا کو زیر کرلیا۔بوائز انڈر 17 میں سیڈ 2 راولپنڈی کے اذان علی خان نے نیو ساؤتھ ویلز کے ہنری کراس کو قابو کر کے ٹائٹل اپنے نام کیا۔ سیڈ 2 احمد علی ناز امریکہ کے فلی کو مات دے کر بوائز انڈر 12 چیمپئن بن گئے۔گرلز انڈر 15 کے فائنل میں سیڈ 2 سحرش علی ایک سخت مقابلے کے بعد جاپان کی ایم ایمیلی سینئر سے 3‘2 سے ہار گئیں اور ان کو سلور میڈل پر قناعت کرنا پڑی۔واضح رہے کہ سکواش کی تاریخ میں تیسرا موقع تھا کہ تین سگی بہنوں نے ایک ساتھ انٹرنیشنل پلاٹینیم کیٹیگری چیمپئن شپ کے فائنل میں کھیلنے کا حق حاصل کیا۔