بھارت میں ٹک ٹاک کے شوق نے نوجوان کی جان لے لی، 18سالہ اقبال ٹک ٹاک ویڈیو پر لائیک نہ ملنے کی وجہ سے مایوس ہوکر پھندے پر جھول گیا۔تفصیلات کے مطابق دہلی سے متصل صنعتی شہر نوئیڈا کے کوتوالی سیکٹر39 کے سالارپور میں ایک نوجوان نے محض اس بات پر زندگی کا خاتمہ کرلیا کہ اسے ٹک ٹاک ویڈیو پر لائیکس نہیں ملے۔اٹھارہ سالہ اقبال ولد رحیم ٹاک ٹاک’ ویڈیوز بناتا تھا ویڈیو پر لائک نہ ملنے کی وجہ سے وہ کافی پریشان تھا اسی ذہنی پریشانی کی وجہ سے اس نے گھر میں پنکھے سے لٹک کر خودکشی کرلی۔یہ حادثہ گزشتہ روز پیش آیا واقعے کی اطلاع ملتے ہی پولیس نے جائے وقوعہ سے لاش اسپتال منتقل کی اس حوالے سے پولیس حکام نے میڈیا کو بتایا کہ پوسٹ مارٹم اور دیگر قانونی کارروائی کے بعد لاش لواحقین کو دے دی گئی ہے۔ پولیس کے مطابق لواحقین نے ابھی تک اس حوالے سے کسی قسم کی کوئی شکایت درج نہیں کروائی ہے۔
واضح رہے سوشل میڈیا پراپنی تشہیر کیلئے ہر شخص بالخصوص نوجوان نسل مختلف طریقے اپنا رہے ہیں، خاص طور پران دنوں ٹک ٹاک’ کے ذریعے ہر خاص و عام اپنی ویڈیوز بناکر لائک اور شیئر چاہ رہا ہے تاکہ بڑے پیمانہ پر لوگ اسے پہچان سکیں۔ان میں سے کچھ کامیاب ہیں اور کچھ کامیابی کے فقدان کی وجہ سے مایوسی کے باعث انتہائی قدم اٹھانے سے بھی گریز نہیں کرتے۔