روہنگیا مہاجرین کو سمندر میں پھینکنے کی اطلاعات، اقوام متحدہ کا نوٹس، بھارت سے وضاحت طلب

جنیوا (نوائے وقت رپورٹ) اقوام متحدہ نے بھارتی نیوی کی جانب سے روہنگیا مہاجرین کو سمندر میں پھینکنے کا سخت نوٹس لے لیا۔ اقوام متحدہ کے انسانی حقوق کمشن نے کہا ہے کہ بھارتی نیوی کی جانب سے روہنگیا مہاجرین کو بحیرہ انڈمان میں پھینکنے کی اطلاعات پر شدید تشویش ہے اور اس حوالے سے ماہرین نے واقعہ کی باضابطہ تفتیش شروع کردی ہے۔ انسانی حقوق کمشن نے کہا کہ یہ اقدامات غیرانسانی، ناقابل قبول اور بین الاقوامی قوانین کی کھلی خلاف ورزی ہیں۔ یہ تصورکہ روہنگیا مہاجرین کو بحری جہازوں سے سمندر میں پھینکا گیا، انتہائی خوفناک ہے۔ جبکہ یہ واقعہ اقوام متحدہ کے قوانین کی سنگین خلاف ورزی ہے۔ کمشن نے مطالبہ کیا کہ بھارتی حکومت ان واقعات کی مکمل تحقیقات کرکے وضاحت پیش کرے اور بھارت ایسے انسانیت سوز اقدامات کو فی الفور بند کرے۔