کراچی (اے پی پی) گورنر سندھ عمران اسماعیل کی دعوت پر پاکستان سپر لیگ (پی ایس ایل) 2019ء کے فائنل میں پہنچنے والی پشاور زلمی اور کوئٹہ گلیڈی ایٹرز کے کھلاڑیوں، کوچز اور دیگر آفیشلز نے گورنر ہاؤس میں دیئے گئے استقبالیہ میں شرکت کی۔ تقریب میں صدر مملکت ڈاکٹر عارف علوی بھی موجود تھے۔ عمران اسماعیل نے کہا کہ لیگ کے کامیاب انعقاد پر پی سی بی مبارکباد کی مستحق ہے، ہماری کوشش ہے کہ پاکستان میں بین الاقوامی کرکٹ کی بحالی کو یقینی بنائیں۔ گورنر سندھ نے مزید کہا کہ بہترین فائنل ہوگا۔ انہوں نے کہا کہ پی ایس ایل کو کامیاب بنانے پر بین الاقوامی کھلاڑیوں کا مشکور ہوں، وزیراعظم کا عزم ہے کہ اگلے سال پی ایس ایل کے تمام میچز پاکستان میں ہی منعقد کئے جائیں، گورنر سندھ اور صدر مملکت نے دونوں ٹیمز کے پلیئرز کو سندھ کی ثقافتی اجرک اور سندھی ٹوپی پہنائی۔ اس موقع پر مصباح الحق نے کہا کہ ہم بہترین فائنل میچ کی امید کررہے ہیں۔