نوازشریف مکار‘ فوج کیخلاف بولنے کیلئے سینٹ ٹکٹ آفر کی: گلالئی‘ جھوٹ ہے: مریم اورنگزیب
![نوازشریف مکار‘ فوج کیخلاف بولنے کیلئے سینٹ ٹکٹ آفر کی: گلالئی‘ جھوٹ ہے: مریم اورنگزیب](https://www.nawaiwaqt.com.pk/print_images/large/2018-02-17/news-1518829078-1300.jpg)
اسلام آباد (بی بی سی +نوائے وقت رپورٹ) رکن قومی اسمبلی اور تحریک انصاف کی سابق رکن عائشہ گلالئی نے پارلیمان کے باہر صحافیوں سے گفتگو میں حکمران جماعت پاکستان مسلم لیگ ن پر الزام لگایا کہ انہیں ملک کی مسلح افواج کے خلاف بیانات دینے پر سینٹ کی نشست دینے کا وعدہ کیا گیا تھا لیکن انہوں نے یہ پیشکش ٹھکرا دی۔ عائشہ گلالئی نے سابق وزیر اعظم نواز شریف پر الزام لگایا کہ وہ ہر جلسے میں اداروں کے خلاف بغاوت کی باتیں کرتے ہیں اور پتہ نہیں کس ایجنڈے پر عمل پیرا ہیں۔ 'ابھی بھی یہ فوج اور عدلیہ کے خلاف پراپیگنڈا کر رہے ہیں۔ میں تو سمجھتی ہوں کہ یہ تو عمران خان سے بھی زیادہ خطرناک ہیں۔' عائشہ گلالئی نے مزید کہا 'عمران خان جذباتی آدمی ہیں اور وہ تو خود اپنے پاؤں پر کلہاڑی مارتے ہیں لیکن نواز شریف مکار انسان ہیں وہ اداروں، فوج اور عدلیہ کو کلہاڑی مارتے ہیں۔' دوسری جانب پاکستان مسلم لیگ ن کے سیکریٹری اطلاعات مشاہد اللہ خان نے بیان میں کہا کہ عائشہ گلالئی کا ملکی سیاست میں ایسا کوئی اہم کردار نہیں ہے جس کی وجہ سے انہیں سینٹ کا ٹکٹ دیا جائے۔ مشاہد اللہ خان نے عائشہ گلالئی کے لگائے گئے الزامات کی بھی مکمل تردید کی۔ پی ٹی آئی کی منحرف رہنما نے الزام عائد کیا کہ نواز شریف نے پورے ملک کا سکریپ اکٹھا کر کے فیکٹری بنائی اور دولت سمیٹی جبکہ مریم نواز کو مانسہرہ جانے کے لئے ہیلی کاپٹر مل جاتا ہے، کیا یہ ہوتی ہے عوامی سیاست۔ وزیر مملکت برائے اطلاعا ت ونشریات مریم اور نگزیب نے کہا ہے کہ عائشہ گلا لئی کا جھوٹ پر مبنی بیان انتہائی افسوس ناک اور قابل مذمت ہے، جھوٹے الزامات لگانے کی بجائے اس لیگی رہنما کا نام بتائیں جس نے اسے سینٹ کا ٹکٹ آفر کیا، مسلم لیگ ن عائشہ گلالئی کے بے بنیاد اور جھوٹے الزامات کے خلاف قانونی چارہ جوئی کرے گی۔ انہوں نے کہا کہ ان کا بیان محض سیاسی شہرت اور اہمیت حاصل کرنے کی ایک مذموم کوشش ہے۔ انہوں نے تحریک انصاف تو چھوڑ دی مگر اس جماعت کے سربراہ کے سکھائے ہوئے جھوٹ کو نہ چھوڑا۔