لندن (آصف محمود سے) دنیا کے نامور ججوں اور وکلاءکی تنظیم انٹرنیشنل کمشن آف جیورسٹس نے اپنی رپورٹ میں کہا ہے کہ امریکہ اور برطانیہ نے گزشتہ 7 برس میں دہشت گردی کے خلاف جنگ کی آڑ میں بین الاقوامی قوانین کی دھجیاں بکھیر دی ہیں جس سے انسانی حقوق حد درجہ متاثر ہوئے ہیں۔ 3 سال میں مرتب کی جانے والی اس رپورٹ میں کہا ہے کہ انسداد دہشت گردی کیلئے بنائی جانے والی پالیسیوں کے خلاف فوری ایکشن لیا جائے۔ رپورٹ جس کا نام \\\"نقصان کا ادراک اور اقدامات کی ضرورت\\\" ہے میں دنیا کے 40 ملکوں سے 16 سماعتوں کے بعد اپنے شدید تحفظات کا اظہار کرتے ہوئے کہا ہے کہ دنیا نے تاریخ سے سبق حاصل نہیں کیا اور دہشت گردی پر جلد بازی کے نتیجے میں انسانی حقوق کے بین الاقوامی فریم ورک کو ناقابل تلافی نقصان پہنچایا ہے۔ اقوام متحدہ کی انسانی حقوق کی سابق ہائی کمشنر میری روینسن کا کا کہنا ہے کہ 11 ستمبر کے بعد دہشت گردی کی آڑ میں بنائے جانے والے قوانین کو فوری طور پر ختم کرنے کی ضرورت ہے۔ جنوبی افریقہ کے سابق چیف جسٹس آرتھر چکلسسن کا کہنا ہے کہ دنیا بھر کے انسانی حقوق کے قوانین کو دہشت گردی کے خلاف موجودہ اقدامات سے سنگین خطرات لاحق ہیں۔ برطانوی سپریم کورٹ کے پاکستانی نژاد وکیل اور ایسوسی ایشن آف پاکستان لائرز کے وائس چیئرمین امجد ملک نے رپورٹ کا خیرمقدم کیا ہے۔ نوائے وقت/ دی نیشن سے گفتگو کرتے ہوئے بتایا کہ برطانوی عدالتوں کا کردار قابل تحسین رہا۔