لاہور (خبر نگار خصوصی) مسلم لیگ (ن) نے واضح کیا ہے کہ پی سی او ججز کے کردار اور ان کے فیصلوں کو تسلیم نہیں کرتے‘ آزاد عدلیہ کے لئے جدوجہد ہمارا قوم سے وعدہ ہے جس کے لئے لانگ مارچ میں اپنا بھرپور کردار ادا کریں گے۔ صدر زرداری اور گورنر پنجاب کی ہدایات کے پابند نہیں۔ پنجاب میں ہارس ٹریڈنگ گورنر پنجاب نے شروع کی۔ دھرنے میں شرکت کے حوالے سے وکلاء قیادت نے اعتماد میں نہیں لیا‘ دھرنے میں شمولیت کا فیصلہ 21 فروری کے اجلاس میں ہو گا‘ یہ اعلان پنجاب مسلم لیگ (ن) کے صوبائی صدر وزیر اعلیٰ کے سینئر مشیر سردار ذوالفقار کھوسہ نے ایوان وزیر اعلیٰ میں ایک بھرپور پریس کانفرنس میں کیا۔ اس موقع پر ان کے ہمراہ راجہ اشفاق سرور‘ صوبائی وزیر سردار دوست محمد کھوسہ‘ اراکین اسمبلی حمزہ شہباز شریف‘ میاں مرغوب‘ ذکیہ شاہنواز‘ چودھری غفور بھی موجود تھے‘ سردار ذوالفقار کھوسہ نے اعلان کیا کہ مسلم لیگ (ن) کی جنرل کونسل کا اجلاس اب 19 فروری کی بجائے 21 فروری کو ہو گا۔