اسلام آباد (آن لائن) سہ فریقی لیبر کانفرنس ایجنڈے کی عدم تکمیل، ورکنگ گروپس کی تشکیل اور کمیٹیوں کے قیام کے بغیر صرف پانچ گھنٹوں میں اختتام پذیر ہو گئی۔ وزارت محنت و افرادی قوت کے زیراہتمام سہ فریقی لیبر کانفرنس میں شرکاء کو ایجنڈے کے بارے میں مسودہ تک فراہم نہیں کیا گیا۔ ورکنگ گروپ کی عدم تشکیل اور کمیٹیوںکے قائم نہ ہونے سے صنعتکار اور مزدور تنظیموں کے نمائندے مایوس لوٹ گئے۔ دن 11 بجے وزیراعظم کے خطاب سے شروع ہونے والی کانفرنس ڈیڑھ گھنٹے کے وقفے کے بعد شام 5 بجے اختتام پذیر ہوئی۔ صنعتکاروں اور مزدور تنظیموں کے رہنمائوں نے بتایا کہ کانفرنس میں قوانین‘ آئی ایل کمیٹیاں اور ورکنگ گروپ تشکیل دیئے جانے تھے مگر اسے چند اعلیٰ شخصیات کی تقاریر کے بعد ختم کردیا گیا۔ کھانے کے وقفے سے قبل مزدور رہنمائوں اور پیپلزپارٹی کے لیبر بیورو کے چیئرمین چودھری منظور احمد میں موجودہ حکومت کی پالیسیوں پر سخت جملوں کا تبادلہ بھی ہوا۔ ہال میں شور مچنے پر چودھری منظور سٹیج سے اٹھ کر باہر چلے گئے۔