آصف محمود جاہ سے سی اے سی کا اجلاس آج طلب کرلیا،بجٹ پرسفارشات طلب

لاہور(کامرس رپورٹر) وفاقی ٹیکس محتسب ڈاکٹر آصف محمود جاہ نے سنٹرل ایڈوائزری کمیٹی کا اجلاس آج لاہور چیمبر آف کامرس اینڈ انڈسٹری میں طلب کر لیا۔ ایف ٹی او کے کوآرڈینیٹر سیف ارحمان نے گزشتہ روز میڈیا کو بتایا کہ اجلاس کا مقصد مختلف شعبوں کے اہم سٹیک ہولڈرز کی مشاورت سے بجٹ تجاویز پر تبادلہ خیال کر کے انہیں حتمی شکل دینا ہے۔ اس اہم اجلاس میں جامع سفارشات تیار کی جائیں گی جو ملک بھر میں معاشی استحکام اور ترقی میں معاون ثابت ہو سکیں۔ کاروباری رہنما، ماہرین اقتصادیات اور تجارتی اداروں کے نمائندوں پر مشتمل یہ کمیٹی اس بات کو یقینی بنانے کی کوشش کرتی ہے کہ بجٹ تجاویز زمینی حقائق کی عکاس اور پائیدار ترقی میں معاون ہوں۔ انہوں نے ٹیکس پالیسیاں بنانے میں سٹیک ہولڈر کی شمولیت کی اہمیت پر زور دیا تاکہ انہیں زیادہ سے زیادہ شفاف، قابل عمل اور منصفانہ بنایا جائے ۔ سیف ارحمان نے کہا یہ اقدام قومی معیشت کو مضبوط اور کاروبار کیلئے سازگار ماحول فراہم کرنے کیلئے ایف ٹی او کے عزم کا عکاس ہے۔ امید ہے کہ اس اجلاس کی سفارشات آئندہ وفاقی بجٹ کی تشکیل میں اہم کردار ادا کریں گی۔