امریکی ریاست کیلیفورنیا کے لگونا ووڈز کے چرچ میں ہونے والی فائرنگ کے نتیجے میں ایک شخص ہلاک جبکہ 5شدید زخمی ہو گئے ۔ امریکا میں ایک ہفتے میں یہ دوسرا فائرنگ کا واقع ہے۔لگونا ووڈز 16 ہزار پر مشتمل ایک قصبہ ہے، جہاں 55 سال اوراس سے زائد عمر کے لوگوں کی ریٹائرمنٹ کمیونٹی رہائش پذیر ہے جسے کبھی لیزر ورلڈ کہا جاتا تھا۔حکام نے کہا کہ 30 سے 40 لوگ صبح سے چرچ میں موجود تھے، جس کے بعد وہ دوپہر کے کھانے کے لیے جمع ہوئے تب ہی دوپہر 1.30 بجے سے کچھ دیر پہلے فائرنگ شروع ہوئی۔ ایک زخمی موقع پر جاں بحق ہوگیا۔ چار افراد شدید زخمی جبکہ ایک شخص کو معمولی چوٹیں آئی ہیں۔ اورنج کائونٹی کے محکمہ نے بتایا کہ تمام متاثرین بالغ تھے اور انہیں ہسپتال منتقل کر دیا گیا۔
