" کوکاکولا نہیں پانی" کرسٹیانو رونالڈو کے معمولی عمل سے کوکا کولا کمپنی کو اربوں ڈالر کا نقصان
بڈہا پسٹ،پرتگال کے فٹبالر کے معمولی عمل سے کوکا کولا کمپنی کو اربوں ڈالر کا نقصان ہوگیا۔میڈیا رپورٹس کے مطابق ہنگری کے دارالحکومت بوداپست میں یورو کپ فٹبال ٹورنامنٹ کے ہنگری کیخلاف میچ سے قبل پرتگال کے اسٹار فٹبالر کرسٹیانو رونالڈو جب پریس کانفرنس کرنے کیلئے آئے تو ان کے سامنے کاربونیٹڈ ڈرنگ کوکاکولا کی دو بوتلیں رکھی ہوئی تھیں۔
رونالڈو نے کچھ لمحے ان بوتلوں کو دیکھا اور پھر دونوں کو اٹھاکر ایک طرف رکھ دیا۔ پھر فٹبالر نے نیچے سے پانی کی بوتل اٹھائی اور سامنے رکھ لی اور یہ بھی کہا کہ ’کوکا کولا نہیں پانی‘۔ رونالڈو دنیا بھر میں کروڑوں فینز رکھتے ہیں جو ان کے ہر عمل کی پیروی کرنا چاہتے ہیں اور ان جیسا بننا چاہتے ہیں یہی وجہ ہے کہ رونالڈو کے اس عمل کو بھی ان کے چاہنے والوں نے کاربورنیٹڈ ڈرنکس کے بائیکاٹ اور پانی کو اپنانے کے پیغام کے طور پر لیا۔اس پریس کانفرنس کے بعد کوکا کولا کے شیئرز کی قیمت 56.10 امریکی ڈالر سے کم ہوکر 55.22 ڈالر پر آگئی جس کی وجہ سے کمپنی کی مجموعی مارکیٹ ویلیو میں 1.6 فیصد (4 ارب ڈالر) کمی واقع ہوئی جو 242 ارب ڈالر سے کم ہوکر 238 ارب ڈالر ہوگئی۔