عمران خان جتنے مرضی کمیشن بنائیں، آپ کو سیلکٹڈ، ووٹ چور اور کٹھ پتلی وزیراعظم کہتے رہیں گے:مریم اورنگزیب
مسلم لیگ(ن)کی ترجمان مریم اورنگزیب نے کہاہے کہ عمران خان جتنے مرضی کمیشن بنائیں، آپ کو سیلکٹڈ، ووٹ چور اور کٹھ پتلی وزیراعظم کہتے رہیں گے۔اپنے بیان میں مریم اورنگزیب نے کہا کہ ہائی پاورڈ انکوائری کمیشن کب بنے گا ؟ عمران خان دھمکیاں نہ دیں، تاریخ بتائیں؟ ، عمران صاحب جتنے مرضی کمیشن بنا لیں، آئین، قانون اور پارلیمان کی بالادستی پہ کوئی سمجھوتا نہیں ہوگا، آپ کو سیلیکٹڈ، ووٹ چور اور کٹھ پتلی وزیراعظم کہتے رہیں گے۔عمران صاحب ایک انکوائری کمیشن بنائیں جو پتہ لگائے کہ کیا تھے وہ ذرائع جن سے علیمہ باجی نے اربوں کی غیر قانونی جائیدادیں خریدیں؟، آپ کی آمدن اور اثاثے کیا ہیں؟ آپ ایک لاکھ ٹیکس کس حساب سے دیتے ہیں؟، عمران صاحب ایک انکوائری کمیشن یہ بھی بنائیں جو تحقیق کرے کہ صرف 10ماہ میں ترقی کی شرح آدھی اور مہنگائی تین گنا کیسے ہوگئی؟، ایک کمیشن بنائیں جو پتہ لگائے کہ ایک کروڑ نوکریوں، 50لاکھ گھروں اور ڈیم فنڈ کا کیا ہوا، اپنی نالائقیوں پر آپ کو ایک نہیں 100کمیشن بنانے پڑیں گے، اس کے علاوہ آپ اپنے دماغی معائنے کے لئے کمیشن بنانا نہ بھولیے گا۔ عمران صاحب پچھلے 10سال کے علاوہ پچھلے 10ماہ کے 5 ہزار ارب روپے کی انکوائری بھی شامل کریں۔