امریکی ٹیرف سے ٹیکسٹائل انڈسٹری پر اثر پڑے گا، گورنر سٹیٹ بنک 

کراچی(این این آئی)گورنر سٹیٹ بنک جمیل احمد نے کہا ہے کہ تیل کی قیمتوں میں کمی سے امریکی ٹیرف کا منفی اثر کم ہو جائے گا۔ایک انٹرویو میں گورنر سٹیٹ بنک نے کہا کہ امریکی ٹیرف سے ٹیکسٹائل انڈسٹری پر اثر پڑے گا مگر تیل کی قیمتوں میں کمی سے امریکی ٹیرف کا منفی اثر کم ہو جائے گا۔انہوں نے کہا کہ شرح سود میں کمی سے حکومت کو ادائیگیوں میں ایک کھرب روپے کا ریلیف ملنے کی توقع ہے۔جمیل احمد نے کہا کہ 30 جون سے پہلے 4 سے 5 ارب ڈالرز آنے کی توقع ہے جب کہ جون کے آخر تک زرمبادلہ کے ذخائر 14 ارب ڈالر ہونے کا ہدف ہے۔ معاشی ترقی کی شرح 3 فیصد تک رہنے کی توقع ہے۔واضح رہے کہ گورنر اسٹیٹ بنک کے تصدیق سے قبل عالمی منڈی میں خام تیل کی قیمتوں میں کمی کے بعد پاکستان میں پیٹرولیم مصنوعات کی قیمتوں میں نمایاں کمی کا امکان ظاہر کیا جا رہا تھا۔