پنجاب اسمبلی میں اپوزیشن لیڈر میاں محمودالرشید نے سپریم کورٹ کے جسٹس اعجاز الحسن کے گھر پر فائرنگ کے خلاف توجہ دلائو نوٹس جمع کرا دیا۔ نوٹس میں حکومت سے استفسار کیا گیا ہے کہ حملے کے بعد تحقیقات میں کیا پیشرفت ہوئی ہے۔ علاوہ ازیں اپوزیشن لیڈر نے پنجاب کے سرکاری ہسپتالوں میں مریضوں کو مفت دی جانے والی 80 فیصد سے زائد ادویات غیر معیاری ہونے کے خلاف بھی پنجاب اسمبلی میں تحریک التوا جمع کر ادی۔ متن کے مطابق سرکاری ہسپتالوں میں مریضوں کو دی جانے والی مفت ادویات غیر معیاری نکلیں، خریدی گئیں 80 فیصد سے زائد ادویات کی مخصوص بیجز پر پابندی لگا دی گئی جبکہ محکمہ صحت کے فارما کو ویجیلینس یونٹ نے ادویات کو غیر معیاری قرار دیا ہے اس کے باوجود ادویات کی فروخت کا سلسلہ سرکاری ہسپتالوں کے میڈیکل سٹوروں پر جاری رہا۔ غیر معیاری ادویات دل ، ہیپاٹائٹس، گلے وغیرہ پر مشتمل ہیں، غیر معیاری ادویات کی فراہمی سے عوام میں سخت تشویش پائی جاتی ہے لہٰذا حکومت سے مطالبہ ہے کہ وہ اس میں ملوث ذمہ داروں کے خلاف سخت کارروائی عمل میں لائے۔