حکومت چائلڈ لیبر کے خلاف قوانین پر عملدرآمد یقینی بنائے: شیخ امجد

16 اپریل 2018

فیصل آباد(نمائندہ خصوصی) سٹی کلاتھ بورڈ کے صدر شیخ امجد عقیل ‘جنرل سیکرٹری عباس حیدر شیخ، چوہدری حبیب گجر ‘ محمد لطیف بٹ ‘ حافظ محمد شفیع ‘ نعیم انصاری ‘ محمد اعظم ‘ مرزا نواز بیگ ‘حاجی محمد ادریس ‘ محمد رفیق ‘ محمد شفیق ‘ محمد صابر‘ محمد تنویر ‘ سہیل بھولا ‘ بائو محمد جمیل ‘ محمد امین ‘ زاہد مصطفی ‘ نوید ریاض ‘ ملک محمد جاوید نے اپنے مشترکہ بیان میں کہاہے کہ صوبہ سے چائلڈ لیبر کا خاتمہ کرنے کے لئے پنجاب حکومت کی جانب سے آئے روز بلندو بانگ دعوے کئے جاتے ہیں مگر حقیقت کا رنگ کہیں بھی نظر نہیں آتا۔جن کمسن بچوں کے ہاتھ میں قلم اور کتاب ہونی چاہیئے وہی بچے ورکشاپوں ،ہوٹلز ،ریسٹورنٹس،چائے کے کھوکھوں ،پٹرول پمپوں ،اینٹوں کے بھٹوں اور مسافر گاڑیوں میں مشقت کرتے نظر آتے ہیں۔ محنت مشقت کرنے والے بچوں کو معمولی غلطی کرنے پر جسمانی تشدد کا نشانہ بھی بنایا جاتا ہے۔ ضرورت اس امر کی ہے کہ حکومت غربت اور محرومی کا خاتمہ کرنے کے لئے انقلابی اصلاحات نافذالعمل کرے تاکہ خوشحال اور ترقی یافتہ پاکستان کا خواب شرمندہ تعبیر ہو سکے۔