ملک بھر میں خواتین اور بچوں سے زےادتی اور تشد دکے واقعات کم نہ ہوسکے
اسلام آباد(نمائندہ نوائے وقت)ملک بھر میں خواتین اور بچوں سے زےادتی اور تشدد کے واقعات کم نہ ہوسکے سماجی تنظیم ، سسٹین ایبل سوشل ڈیولپمنٹ آرگنائزیشن(ایس ایس ڈی او) اور سینٹر فار ریسرچ، ڈویلپمنٹ اینڈ کمیونیکیشن(سی آر ڈی سی) کی تحقیقاتی رپورٹ کے مطابق اگست کے مہینے میں پاکستان بھر میں 136 خواتین کو اغوا، 71 کی عصمت دری جبکہ 114 بچوں کے ساتھ جنسی زیادتی کے واقعات پیش آئے رپورٹ کے مطابق ماہ اگست میں میڈیا میں خواتین کا اغوا، خواتین پر جسمانی حملہ، گھریلو تشدد اور بچوں کے ساتھ جنسی زیادتی کے واقعات سب سے زیادہ رپورٹ ہوئے۔ مسلسل چوتھے مہینے میں میڈیا میں سب سے زیادہ خواتین کے اغوا کے واقعات رپورٹ ہوئے، جن کی کل تعداد 136 تھی، جو کہ گزشتہ ماہ کے 133 سے تقریبا مماثلت رکھتی ہے۔ ان میں سے 80 کیسز صرف صوبہ پنجاب سے رپورٹ ہوئے، جبکہ سندھ میں 31 کیسز ہیں۔ جب خیبرپختونخوا، اسلام آباد اور بلوچستان میں کم تعداد رپورٹ ہوئی جہاں بالترتیب 11، 8 اور 6 کیسز سامنے آئے۔خواتین پر جسمانی تشدد کے 87 واقعات رپورٹ ہوئے جس میں گزشتہ ماہ کے مقابلے میں نمایاں کمی دیکھنے میں آئی۔ پنجاب میں 52 کیسز رپورٹ ہوئے۔ سندھ میں 20 کیسز رپورٹ ہوئے، اس کے بعد خیبرپختونخوا میں 13 کیسز رپورٹ ہوئے جبکہ بلوچستان سے صرف دو کیسز سامنے آئے۔اسی طرح کی تعداد گھریلو تشدد کے 83 کیسز پچھلے مہینے 94 سے کم رہے۔ان میں نصف کیسز پنجاب سے رپورٹ ہوئے (42)۔ دیگر صوبوں کو دیکھیں تو کے پی اور سندھ میں بالترتیب 17 اور 13 کیسز رپورٹ ہوئے جبکہ بلوچستان اور اسلام آباد میں بالترتیب 6 اور 5 کیسز رپورٹ ہوئے۔اگست کے مہینے میں ملک بھر میں خواتین کے ساتھ عصمت دری اور جنسی زیادتی کے 71 واقعات رپورٹ ہوئے، یہ بھی جولائی میں رپورٹ ہونے والے 85 واقعات سے کم رہے۔ان میں 41 کیسز پنجاب میں تھے، پھر سندھ اور کے پی میں بالترتیب 12 کیسز اور 10 کیسز ، اس کے بعد بلوچستان میں 6 اور اسلام آباد میں سب سے کم (2) رپورٹ ہوئے۔اگست کے مہینے میں 20 بچوں کو جسمانی زیادتی کا نشانہ بنایا گیا جو کہ جولائی میں رپورٹ ہونے والے 37 واقعات سے واضح طور پر کم تھا۔ ایک بار پھر، تمام کیسز میں سے نصف سے زیادہ پنجاب میں پیش آئے، جن کی تعداد 12 رہی جب کہ تین دیگر صوبوں: سندھ، کے پی اور بلوچستان کے ساتھ ساتھ وفاقی دارالحکومت اسلام آباد می بھیں دو، دو کیسز تھے۔ اگست کے مہینے میں ملک بھر میں 17 بچوں کو بھی قتل کیا گیا جو کہ گزشتہ ماہ کے 22 واقعات سے کم ہیں۔ ان میں سے 11 پنجاب سے رپورٹ ہوئے جبکہ سندھ، بلوچستان اور کے پی میں 3، 2 اور 1 کیس رپورٹ ہوا۔خبروں میں بچوں کی شادی کے 9 کیسز رپورٹ ہوئے۔ ان میں سے 5 پنجاب، 3 کے پی اور 1 سندھ میں ہوا۔ اسی طرح اگست کے مہینے میں چائلڈ لیبر کے 9واقعات میں سے پنجاب میں 8 اور اسلام آباد سے ایک کیس ریکارڈ کیا گیا۔ بچوں کے ساتھ نفسیاتی زیادتی کے 2 واقعات سامنے آئے، دونوں کا تعلق پنجاب سے ہے۔ میڈیا میں خواتین، بچوں کی سمگلنگ یا خواتین کے ساتھ نفسیاتی زیادتی کا کوئی کیس رپورٹ نہیں ہوا۔
وی آر ڈی سی