کام کوئی اور کرا رہا ہے، معائنہ کرنے آپ آگئے، شہری کا میئر کراچی پر طنز
کراچی (صباح نیوز)مئیر کراچی وسیم اختر کو سڑک کی تعمیر کا معائنہ مہنگا پڑگیا، موقع پر موجود شہری نے طنز کیا کہ کام کوئی اور کروا رہا ہے مگر معائنہ کرنے آپ پہنچ گئے۔وسیم اختر پر شہری کی جانب سے طنز کیے جانے کے بعد دونوں ایک دوسرے سے تمیز سے بات کرنے پر اصرار کرتے رہے، صحافی نے جب میئر کراچی سے تو تو میں میں کی وجہ پوچھی تو وسیم اختر بولے، ایسے لوگ مل جاتے ہیں سرِ راہ چلتے چلتے۔ واضح رہے کہ کراچی کے شہریوں کا عمومی شکوہ یہی ہے کہ ایم کیو ایم کی سیاسی قیادت کی طرح، ان کے بلدیاتی نمائندے بھی وہ کام نہ کرسکے جو شہر اور شہر میں رہنے والوں کی ضرورت تھے۔ اس شکایت کا عملی مظاہرہ منہ در منہ اس وقت بھی دیکھنے میں آیا جب میئر کراچی فیڈرل بی ایریا کے علاقے نصیر آباد میں زیر تعمیر سڑک کا معائنہ کرنے پہنچے تھے۔