پاکپتن: حضرت بابا فرید الدین مسعود گنج شکرؒ کے 776ویں عرس کی تقریبات جاری، بہشتی در وازے کی قفل کشائی کل ہو گی
پاکپتن (نامہ نگار+ نمائندہ نوائے وقت) حضرت بابا فرید الدین مسعود گنج شکرؒ کے 776 ویں سالانہ عرس کی تقریبات جاری ہیں، بہشتی دروازہ کی قفل کشائی کل ہوگی، زائرین کی آمد کا سلسلہ جاری ہے۔ عرس کی تقریبات درگاہ کے سجادہ نشین دیوان مودود مسعود چشتی اپنے ولی عہد سجادہ نشین دیوان احمد مسعود چشتی فاروقی کے ہمراہ ادا کررہے ہیں، اس دوران لاکھوں عقیدت مند عرس کی رسومات میں شرکت کی سعادت حاصل کرتے ہیں، 15روزہ عرس کی سب سے بڑی رسم بہشتی دروازہ کی قفل کشائی کل بروز اتوار کو ادا کی جائے گی۔ ڈسٹرکٹ پولیس اور انتظامیہ کی طرف سے عرس بابا فرید کے موقع پر انتہائی احسن انتظامات کیے گئے ہیں، زائرین کو مکمل سرچنگ کے بعد دربار کی حدود میں داخل ہونے دیا جارہا ہے۔